1 Tesalonika 4

Uara imbaro nyontarai endoaoa pa embeng na mamarang

1Impaina maneta pa mia, mia piana mentaraoa na antoru kawio anyau pa pau kia parari topitotoi membeng pa imbaro metong Allai anerarong merarising we mia. Piyana pa piana metong pararia to, mana we mai ea mamo antorewara mia na Sen Yesusi Kristusi we mia we metong pararia na kangkuna ea. 2Wo piana mendearoang kamangpa we antorona we mia na Sen Yesusi ne paya pa. 3Tutu Allai ne awiapa imbaro: membeng Wei, memamarang, mentampi pitaubai we unawa pa, 4muang paya koiri-koiri didau ne wawini koiri mae wieng kong ne wawini napei wemamarang na Allai renapa kong na nyontarai paya endenapa. 5Mendeo mesanekangkong mene mamota pa pe, parari nyontarai we endearong Allai wa etonapa pe. 6Kong imbaro nyontarai pei reo dosara we neta pai ete weangkari pe. Pampong pa piana amasuara na paya we mia, we Seni ingkai dong-mambabati we nyontarai enari sarara toyana pa. 7Tutu Allai yau tata we tambeng we tatong parari mamotapai wa, mana we tambeng na wemamarang. 8Impaina nyontarai we deing anyau nini deing nyontarai wa, mana deing Allai we dong Duainunung Mamarang pai we mia pa. 9Tutu Allai mantauni di piana denyau mia we mesanewiwu waweri mia pa. Impaina etoi we yenyau mia pa ea wa parari topitotoi andi mesanewiwu meneta pa ya we endoaoa parari mia pa. 10Piyana pa metona tato we maneta paya engkai we enai na raora Makedonia paito. Mana antosua maneta pa mia, imbaro metong pararia na we maitui ea. 11Metongsaera we membeng na wemadori kong nyontarai eaya kong mendeo mengkonta na nyontarai pea ene amuna pa pe, kong metamuna we anemai mamo memariwa we metadu roweang ete pe we mia. Metong toyana parari pitoai antontopana we mia eampa. 12Impaina na toyana pa mesanesara we nyontarai eaya we empata mia wa, kong nyontarai endoao Allai wa paya erewo membengtoapa kong entuang we mia.

Seni Riama

13Maneta pa mia amasanewea imbaro mendearona pitarai parari nyontarai we piana engkada paya, imbaro mendeo metaidu parari nyontarai eaya we esanesara wa pa ya pe. 14Tutu tandoaoa we Yesusi piana keda mana wieng taweri. Aidonane tandoaoa we nyontarai we piana endoao Yesusi mae engkada paya Allai ingkai dong ya embeng taweri ea kong penduikui ya kongti. 15Parari ninane, antontopana we mia Seni ne kawio sopana pa tonina: Na awe Sen Yesusi riama pa, nyontarai we tambeng ki Seni riama pa, topitotoi kia tampampong nyontarai we piana engkada pampong paya wa. 1 16Wo na awe Allai dong airora pa, mampang we tedaipai yau na weraupui kangkuna kong Allai ne tabura pai riotu. Impaina Sen Yesusi mantau wia na rora-marising, kong nyontarai endoao Kristusi piana engkada paya ingkai embeng taweri pampong. 17Interi we tamayoi tambeng ki a yani pai, tata ingkai enduwa tata kuira kong ya na mandipi rarong we tatamamang Seni na rorapai. Interi tata ingkai tanai kong Seni ki woroi-woroi. 18Impaina mia metanyau waweri mia na kawio yanapa imbaro mesanerarong pa paya.