1 Tesalonika 3

Timotiusi kio Arera Mamarang

1Antosanerarong aidu we antondeo mia pa piana antosane na mia ea wa to, impaina antokutua we unai na bendari na Atena,1 2interi urami Timotiusi uneta pai, Allai ne mampata we meriwa kong andu we Allai na antombuwu Arera Weweng parari Kristusi pai, we denyau mia imbaro mesanerarongpai paya kong mendoao Kristus na maitui, 3imbaro nyontarai peaya endeo esaneriru na endeoa pa tutu uira nini pe. Mia piana mantau mendearoana we uira tataduta nina pa, Allai kemangkamana we tawa na tanetarai pa to. 4Wo na awe antopandukui mia pa, piana antontopana we miato, we ingkai tatadu uira pa. Kong mia mendearoana eampa, wo piyana pa piana tawa to. 5Aidonane yemamang wa, mana yemi Timotiusi we mia, tutu yau aneuwea kia we ereukamana parari topitotoi mene mendoaoa pa. Wo aneuriru kia we ereukamana parari mia we donane Nyombatangpai sou mia we metuari pe. Toyana mamo pitoai antoserai tutura pa piraiwoi. 6Mana ninane, na awe Timotiusi tewerima warui miama pa, i kio arera mararising kia we antoru parari mene mendoaoapa kong parari topitotoi mesanewiwu waweri mia pa. Kong parari topitotoi mia mesaneo antoru na we mai kong metaidu we mempandura kong antoru. Parari antoru tato antoraidu we antompandura kong mia.2 7Impaina maneta pa mia na uira pitau kong weaseung we antoradutapa antomararising tuturapi pitoai antontaraoa pa parari mene mendoaoa pa. 8Ninane piana antombeng taweri, topino metoa mempaya na Seni. 9Antontopang piboki baba raweina we Allai tutu mararising taubai we antoraduta pa na tane Allai renapa tutu mia, na awe antotandau we I pa. 10Diru raida mamo antotandau na pitarai we mia imbaro antondeo mendekamipa ea, kong antopata mia na pitoai mesaneweapa imbaro mendoao Kristusi na wemai ea. 11Antorewara we Allai tantamami pai, kong we tane Sen Yesusi, yepa rampai we antoru we antopandukui mia. 12Kong antorewara we Seni tato we dong mia mesanewiwu mia baba raweina kong mesanewiwu nyontarai eaya pa na paya ea, parari antoru tato antosanewiwu mia pa nina. 13Antontandau we Seni dong mesanerarongpai paya, imbaro na Allai tane Yai renapa memamarang kong menari sararapa wa na awe tane Sen Yesusi teweri kong ne nyontarai tau emamarang paya mapa.