Skip to content
BibleKenya

Alkitab Bahasa Ansus

1 Tesalonika 2

Paulusi meriwa na Tesalonika

Mia piana mantau mendearoana, we na awe antondawu manetapa miama pa we antondu mariwa we miapa mamo kakawiri wa. Mia piana mendearona to we awe antonda wu mia to bendari Tesalonika nei wami, mana nyontarai na bendari Pilipi paya piana engkangkani antoru kong entatipa antoru, mana tane Allai piata antoru, impaina na uira we mamba pa mana antoradu paya we antombuwu Allai ne Arera Weweng pai we mia.1 Wo kawio we antotopana we mia imbaro mendoaoa pa, kawio sarara pina wa, kong antoraunyaua we antoradu pianea warui mia wa ete antombeangkari mia wa. Kong antokawio we antoradu nyontarai peaya esanerarong wa, mana weapi waua Allai anerarongpai, we sou tasanerarong nei. Mae tutu Allai rearoang antoru we antomai we rioao Arera Weweng pa we antoru, we antokawiora. Tutu parari pitoai mesaneaoa eampa, wo antosoreboya na ea wami kong antoranyuing antosanetatua kararia pea we antoradu pianea we antoru wa, Allai rearoang antoru parari pitoai antonari pa. Antoru tato antoserai we nyontarai etaparanding antoru wa, na mia ete na nyontarai peaya. Tarai we Kristusi ne rasuri di antoru paina, antone paya we antorewa pianea na mia. Mana antonai na mene madukuira pa antomanang we mia, antomparariapi nyontarai inyani we dosaiwa ne kumai paya na manaang. Toyana tato na antoru, na atosanewiwu baba we mia pa, donane antosaneatora we mia peinaki wa Arera Weweng na Allai pa, mana antombengne tato we mia, tutu antosanewiwu we mia paina. Wo mia mesaneaoa topitotoi antomariwa kangkuna diru raida imbaro antosaseung nyontarai pei na miape, na awe antombuwu Allai ne Arera Weweng nei we mia pa. Miatino membesaksi kong Allai tato, we antombengne na mamarang, na pitarai kong antonari pisarara pea wa na nyontarai mendoaoa pa mene madu pa. Mia tato mendearona we antoru wo antonari saiwa mia parari nyontarai yai we dosaiwa ne kumai paya na wepiboki. Antoranyau mia kong antonari mesanerarongpa paya koiri-koiri, kong antorewara na kangkuna imbaro mia membeng parari Allai ne awiapa, we yau mia we menai na ne riu we Mananu pa kong Ne Baba raweina pa.

Mararising tutu jemaati

Antoru kong antorong piboki pampang konta we Allai, wo na awe antombuwu Allai ne Arera pa we mia pa mentaraoa kong metamamang wea na wemai, wo kawio na nyontarai ne antoru wa, mana we Arera na Allai pina. I andi meriwa na mesanerarong pai pa. Wo pitoai metaduta pa piana Allai ne jemaati paya na Yudea we endoao Kristus Yesusi paya etaduta to. Mia tato metadu uirapa na kawasa menempa ya tutu mendoao Yesusi Kristusi paina, parari jemaati na Yudea we etadu uirapa na kawasa Yaudi paya pa.2 Nyontarai Yaudi pa piana emung Sen Yesusi kong nabi paya kong etongkangkani antoru. Pipatotoiai weng we Allai pa ya esuwirera kong embemarowa we nyontarai neya engkai.3 Tutu ya etongwawido antoru we antombuwu Arera Weweng wadi we kawasa eaya we etadu pariripa. Na toyanapa ya etong sasari pampang kio ne paupa piana mai to, donane Allai dong mambabati mamba weya. Mana maneta pa mia we awe woroi kapara wa antotapira warui mia, mana antosanerarongnei kikeu mia. Antoraidu we mia kia kong antoserai kangkuna we antopandura kong mia ea. Antosanewea we antondawu mia mantu, kong yau, Paulusi, yosaera toyana we bototoito mana nyombatang yowe antoru. Wo mia metona mamo antosanesara kong antomararising konta antomaya antoru na Yesusi, tane Seni, renapa na awe ria teweri ma pa. Tarai-pitarai, mia metona paina antomaya kong antomararising ne.

Source notes (3)
  1. Cross-reference Kis. 16:19-24, 17:1-9
  2. Cross-reference Kis. 17:5
  3. Cross-reference Kis. 9:23,29, 13:45,50, 14:2,5,19, 17:5,13, 18:12

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.