2 Tesalonika 1

Tabea

1We manetapa mia na jemaati Tesalonika, aino nyontarai mesomi we tane Yai Allai kong Sen Yesusi Kristusi pa mia.

Weraungnei napei antoru, aino yau Paulusi, Silwanusi kong Timotiusi.1 2Antosanesara we Allai, tantamami pai ne madori piboki we rana tane Sen Yesus Kristusi, dong ne weweng dona pinoma pa derua mia.

Kawio Piboki kong tandau

3Netapa mia, anemai mamo andi antorewa piboki pampang we Allai tutu topitotoi membeng toapa. Kong antoru piana andi antonari toyana, tutu mendoao Kristusi na wemai ea pa kong mesanewiwu waweria mia na paya era. 4Impaina na awe antompaio Allai ne jemaati na nu ea wau yapa, na antosanerarong wetedai antotopang parari mene mendoaoa maitui na Seni, na uira kong kangkania we metadutapa na nyontarai neapa. 5Pitau we metaduta yanapa denyawa we Allai kiutu kawio na wemai, impaina I kiutua we mia memai we metadu Ne riu we Mananu pa, tutu uira we nina ne metaduta we mendoao Allai paina. 6Allai mamo wekiutu kawio na wemai dina, impaina I ingkai dona taweri didiwapa we nyontarai we etong mia metadu didiwa nina pa. 7Kong dong ayaa pa we mia we nina ne metadu uirapa, kong dona konta we antoru, na awe Sen Yesusi wia na rora-marising maweu denyawi Netaraipai kong ne mampang paya, na Ne paya pa na adia weduruara rarong pai. 8Kong dong mambabati pa we nyontarai we emaidai endearoang Allai kong emaidai etong parari Arera Weweng parari tane Sen Yesus Kristusi pa. 9Nyontarai yana paya ingkai etadu mambabati muna-munai we woroi-woroi pa, mae I yo ya tori warui Renapa kong warui Ne paya we dea wieria pai. 10Tau yana pa ingkai tawa na awe ingkai we koiri ki na Riama wane we Ne nyontarai emamarang paya aino ne nyontarai endoaoi paya kuira we etaparandini kong esomi wei. Mia tato mengkonta na a yani tutu mendoao piwe antombuwua pa paina. 11Impaina antotandau pampang we mia imbaro tane Allai reo mia we memai we ne nyontarai mentuari di mia kong metongparari Ne awiapa, kong I dong paya we mia imbaro mempaya we metongparari pitoai mesanetatuata we menari pa na weng, 12imbaro na mia, nyontarai paya etaparanding Yesusi, tane Seni anompa, kong mia tato Yesusi deparanding mia, parari tane Sen Allai kong Sen Yesus Kristusi une weweng urona pinoma we mia eampa.