Tito 3

Kwo pa Lakricitayo

1Po wigi ducu me miine ken gi ite loc pa luloc, ki ite loc pa wegi twero, me bedo ki winy, ki me yube pi tiyo tic mo mabeco ducu. 2Guwek loko lok marac ikom ngat mo, guwek daa, gubed jo ma lukica, lunyut woro bot dano ducu ikare ducu. 3Pien wan ki komwa yam kong wabedo luming, jo ma pe luwiny; yam warwenyo woko ata, wabedo opii pa mitiwa ki jami mapatpat ma yomo cwinywa. Wabalo karewa i rac me cwiny ki mone, ki dano gukwerowa ki wan bene wakwerogi, ki wan bene onongo wadage gire kekenwa. 4Ento ikare ma ber ki mar me kica pa Lubanga Lalarwa onen, 5en olarowa woko cut, pe pi tic mo ma wan watiyo i kit ma atir, ento pi kicane gire. En olarowa ki pii ma olwokowa me nywale tyen me aryo ki me doko jo manyen pi Cwiny Maleng. 6En oonyo Cwiny Maleng ikomwa madwong kun wok ki i Lalarwa Yecu Kricito, 7wek dong kikwanwa ni kitwa atir pi kicane, wek omii wanong kwo ma pe tum ma genwa tye iye. 8Lok man lok me ada.

Amito wucung matek ikom lok magi, wek jo madong guye Lubanga gubed ki tam me mine me tiyo tic mogo mabeco; meno aye ber, dok bedo me kony bot jo ducu. 9Kwer pyem ikom lok mogo me mingomingo, lok ikom nying kwaro, daa ki laro lok ikom cik. Magi ducu pe konyo, dok konygi peke. 10Dano makelo apokapoka ka dong iciko kicel nyo kiryo kwe, dong omyero iweke woko matwal, pe dok iribe kwede, 11kun ingeyo ni, kodi danonu dong ongak woko, dok obalo, ki en dong bene ongolo kop woko ikome kene.

Cik me agiki

121

Ka abioro Artema nyo Tukiko boti, ket tek ibin bota i Nikopoli, pien dong atyeko moko tama me bedo kunu ikare me ngico. 132 Ket tek me konyo Jena ma en dano ma ngeyo cik, gin ki Apolo i wotgi, nen ni gin mo pe orem botgi. 14Danowa bene myero gumine ken gi itiyo tic mabeco wek gubed ki yo me konyo luwotgi ma can mo odiyo; pe gubed jo ma konygi peke macalo yat ma pe nyak.

15Ka dong agiko waraga man, jo ducu ma gitye kacel kweda kany gumoti. Mot jo ma marowa i niye.

Kica pa Lubanga obed kwedwu ducu.