Tito 2

Pwony me ada

1Ento in, pwony lwak jo muye ki pwony me ada. 2Lok bot jo muteggi ni gubed jo ma wigi twolo, jo me awora ma gin kwo ki ryeko, jo ma juke ken gi, jo ma niyegi ki mar gi tye kakare kun gicung iye matek. 3Kitmeno bene wac ki mon madito ni gin myero gubed ki woro ikit bedogi ducu, pe gucok dog jo mukene, pe gubed jo ma dong gudoko opii pa kongo. Myero gubed jo ma pwonyo gin maber, 4ka dong wek gucak gupwonyo mon matino me maro cogi ki lutinogi, 5dok bene gubed mon ma juke ken gi, mon maleng ma pe gitye ki tam mo me carocaro, ma gigwoko pacogi, mon ma lukica kun giworo coggi bene, weko jo mukene pe gicayo lok pa Lubanga. 6Kitmeno bene, cuk cwiny awobe ni myero gugwoke ken gi. 7In kikomi nyute macalo lanen me tic maber i yo ducu. Bed ki ada kun iketo cwinyi iye. 8Lok lok ma kakare ma pe dok kitwero nongo roc mo iye, wek omii lewic omak ngat mo ma mito pyem kwedwa, pien pe dong bineno gin mo marac ma myero ewac ikomwa. 9Wac ki opii ducu ni guwor luditogi, guyom cwinygi bene i yo ducu. Pe gubed lupyem, 10kadi lwite ki jami bene, ento omyero gunyut ni gin jo ma gene maber tutwal, wek i gin ducu gumi pwony pa Lubanga Lalarwa onen ma mwonya.

11Pien kica pa Lubanga dong onen pi laro dano ducu. 12Kica meno pwonyowa me kwero lubu kit pa jo ma pe lworo Lubanga, kacel ki miti ducu me lobo man, dok bene pwonyowa me juke kenwa wek wabed ma cwinywa atir, kun walworo Lubanga, 13kun wakuru gum ma genwa ocung iye, en aye me neno Yecu Kricito, Lubangawa madit ki Lalarwa, ka bidwogo i deyone. 141 En yam omine kene pirwa me kokowa woko ki i bal ducu, ki me lonyowa wabed jone kikome, ma watye ki miti madwong me tiyo tic mabeco.

15Tit botgi lok magi; cuk cwinygi dok ijukgi ki twero ducu ma itye kwede. Pe imii ngat mo ocayi.