Tito 1

Mot

1Waraga man oa ki bot an Paulo, latic pa Lubanga dok bene lakwena pa Yecu Kricito. En yam oyera ka oora me nyayo niye pa jo ma Lubanga oyero, ki me niangogi ilok me ada ma rwate ki kwo me woro Lubanga, 2wek gubed ki gen me nongo kwo ma pe tum. Lubanga ma pe loko lok goba aye yam ociko pire i acaki piny, 3ka dong karene oromo ci onyutu woko kamaleng, i loke ma kimiyo bota me atita malube ki cik ma Lubanga Lalarwa omiya. 41

Bot Tito, latina i niye acel me ada ma wanywakoni.

Lubanga Wonwa ki Lalarwa Kricito Yecu omii ki in kica ki kuc.

Tic pa Tito i Kurete

5Man aye gin ma omiyo aweki i Kurete, ni wek iyub gin mayam odong ma peya tye kakare, dok iket lutela i taun madongo ducu, kit ma nene aciki kwede ca. 62 Latela myero obed dano ma lok mo marac pe ikome, ngat matye ki dako acel keken. Lutinone bene myero gubed jo ma oye Rwot, ma lok me carocaro mo pe owinye ikomgi, nyo kadi ki lok mo me jemo. 7Pien latela, macalo en lagwok jami pa Lubanga, myero obed dano ma lok marac mo peke ikome. Myero pe obed ngat ma nyate, nyo ma kiniga mako oyotoyot, nyo lamero, nyo lakolo, kadi laworo me nongo lim. 8Myero obed dano ma gwoko welo, ma maro gin maber, dano ma lone kene, ma cwinye atir, dano maleng, dok ngat ma juke kene. 9Dok bene myero en omak matek lok pa Lubanga me ada mayam kipwonye kwede, ma miyo en twero cuku cwiny dano ki pwony me ada, dok twero loyo tam pa jo ma jemo ikome.

10Pien jo ma gin lujemo tye pol, jo ma loko lok ma tere pe, ki jo ma bwolo dano, makatone dul pa jo ma mito ni, jo muye Kricito myero kong gulire. 11Kodi jonu myero kijukgi wek guling woko cut, pien gitye ka rwenyo dano mapol wa ki jo ma i odigi ducu, pi pwonyogi ki gin ma pe opore ma pe myero gupwony ki dano, pi woro me nongo lim. 12Ngat mo acel ki ikin jo Kurete, ma en lanebigi kikome, yam owaco ni, “Jo Kurete kare ducu gin lugoba, lee mager, ma guwor dok komgi nyap.” 13Caden meno tye ada; pimeno myero ijukgi ki tek, wek gucak bedo ki niye me ada, 14wek dong pe gubed kaketo cwinygi me winyo lok pa Lujudaya me ododo mogo ma tere pe, ki cik pa jo ma gidag lok ada. 15Bot jo maleng, jami ducu bene leng, ento bot jo madong gubale woko, ki jo ma pe tye ki niye, pe tye gin mo dong maleng ki botgi. Ryekogi kikome ki tam ma i igi ma nyutu botgi balgi dong otyeko bale woko. 16Gitucu kidog gi ni gingeyo Lubanga, ento dok bene gikwere woko ki timgi; dong gudoko calo gin ma cwiny dano okwero, gin pe luwiny, dok pe gupore me tiyo kit tic mo maber.