2 Temceo 4

1Aciko in inyim Lubanga ki inyim Kricito Yecu ma bingolo kop pa jo makwo ki jo ma oto, dok pi dwogone ki pi loce, ni meno, 2itit lok pa Lubanga, cung iye matek ikare maber ki ikare marac, mi dano guniang maber, jukgi kun icuku cwinygi i pwony ikare ma ipwonygi kun idiyo cwinyi i yo ducu. 3Pien kare tye kabino ma dano dong pe biciro pwony me ada, ento itgi bibedo kayilo ayila, kun gicoko lupwony matwero pwonyogi ki gin ma gimito winyone. 4Gibiloko ngegi wek pe giwiny lok ada, kun gingak woko giwire ilok ma tere peke. 5Ento in omyero ibed ma wi twolo; cir can ka opoto ikomi, tii tic me tito lok me Kwena Maber, dok icob tici ducu kakare.

6An dong dano cok neka woko calo gitum me atyera iwi keno tyer; karena dong oo me weko lobo man. 7Dong atyeko lwenyo lweny maber, atyeko cobo ngweca, dok agwoko bene niye. 8Kombedi dong kikano pira mot pi kit ma atir, ma Rwot ma ngolo kop atir bimiya inino maca; pe bota keken, ento bot jo ducu madong cwinygi tye ka paro pi dwogone bene.

Lok ma Paulo ociko

9Tem ki tweroni ducu me bino bota oyotoyot. 101 Pien Dema dong oweka woko pi maro jami me lobo ni, ocito gire woko i Tecalonika; Kurecen ocito mere i Galatia, ki Tito ocito i Dalmatia. 112 Luka kene aye odong tye kweda kany. Wubin wun ki Marako, pien en ber tutwal dok konya. 123 Aoro Tukiko ocito i Epeco. 134 Ka ibino, kela ki bongo mayam aweko i Teroa i gang pa Karpo. Kwoka bene buka, makatone maca me del ca. 145 Alegijanda latet mola otima marac tutwal; Rwot bicule malube ki kit timenu. 15In bene omyero item gwoke ikom nyer nu, pien en yam opyem ki lokwa matek mada. 16I pidona mukwongo, dano mucung pira obedo pe. Jo ducu guringo gutenya woko liyak. Lubanga omyero pe okwan lok man iwigi. 17Ento Rwot ocungo ka ngeta, ka dong omiya teko me tucu lok kakare, wek Lurok ducu guwiny. Kitmeno en olara ki i dog labwor. 18Rwot bikonya miyo aa woko ki i gin maracu ducu, kun lara wek ao i ker ma mere me polo. Deyo obed bote nakanaka. Amen.

Mot me agiki

196

Mot Pricika gin ki Akwila, ki jo me ot pa Oneciporo. 207 Eracto mere yam odong i Korint; Tropimo aweko tye ka two i Mileto. 21Ket tek io ma kare me koyo peya ocake. Yubulo omoti, kadi ki Puden ki Lino, ki Kalaudia, kacel ki utmegiwa ducu.

22Rwot obed i kwoni. Kicane obed kwedwu.