Jo Roma 8:28

Kwo i Cwiny

1Pimeno, kombedi pe dok kingolo kop loyo jo ma gilubu Kricito Yecu. 2Pien cik pa Cwiny mamiyo dano kwo i Kricito Yecu dong ogonya woko ki ite Cik me bal ki to. 3Gin ma onongo Cik pe twero tiyo, pien kwowa me anywali onongo oloko odoko goro, Lubanga aye madong otiyo. En ooro Wode kikome me bino ikit kom ma cal ki mewa ma bal obwoyo wokoni, macalo gitum ma kityero bot Lubanga pi bal. Kombedi dong en ongolokop oloyo bal ma tiyo ki kwowa ma kinywalowa kwedeni woko. 4Lubanga otimo man wek gin ma atir ma cik mito ocobe ikomwa, wan jo ma pe dong walubu kit me kwowa me anywali, ento wakwo i yo ma Cwiny Maleng mito. 5Pien jo ma bedo i kwo me anywali pa dano, giketo tamgi bene ikom gin ma lubu kit kwo me anywali pa dano; ento jo ma gibedo i kwo me kit pa Cwiny Maleng giketo tamgi bene ikom gin me Cwiny. 6Keto tam i yo me kwo me anywali pa dano en aye to, ento keto tam i yo me kwo me kit pa Cwiny Maleng en aye kwo ki kuc. 7Pien tam ma kiketo i kwo me anywali pa dano bedo me adagadaga ikom Lubanga, pien pe winyo cik pa Lubanga, pe bene twero lubune. 8Jo ma gibedo kun gilubu kit yo me kwo me anywali pa dano pe gitwero yomo cwiny Lubanga.

9Ento wun pe wutye ikit kwo me anywali pa dano, wun wutye i kwo me Cwiny, kace Cwiny pa Lubanga bedo i iwu. Ngat mo ma pe ki Cwiny pa Kricito, nongo en pe dano pa Kricito. 10Ento ka Kricito tye i iwu, kadi bed komwu to pi bal, ento cwinywu bedo kwo, pien yam dong kikwanowu woko ni kitwu atir. 111 Kace Cwiny pa ngat ma ocero Yecu ki ikin jo ma otoni bedo i iwu, en Ngat ma ocero Kricito Yecu ki ikin jo ma otoni bene bimiyo kwo kadi wa ikomwu ma to wokoni, pi Cwiny mere ma bedo i iwuni.

12Ma omiyo utmegina, watye ki banya, ento pe me lubu kit kwo me anywali pa dano. 13Pien ka wubedo kun wulubu kit kwo me anywali pa dano ci wubito; ento ka wugiko tic me kwo me anywali pa dano woko pi Cwiny Maleng, ci wubibedo jo makwo. 14Pien jo ducu ma Cwiny pa Lubanga telogi, gin aye lutino pa Lubanga. 152 Yam pe onongo wugamo cwiny me bedo opii, wek wudok cen ilworo; ento wugamo cwiny me bedo lutino pa Lubanga, ci pi tek pa Cwiny pa Lubanga omiyo wan wakok bote ni, “Abba! Wora!”3 16Cwiny Maleng kikome aye ribe ki cwinywa kun tucu ni wan lutino pa Lubanga. 17Ka dong wan lutino Lubanga, ci wan bene wabinywako lonyo pa Lubanga ma pe tum kacel ki Kricito, kace waciro can kacel kwede, wek bene walim deyo kacel kwede.

Deyo ma binen i anyim

18Angeyo ni can me kare man pe myero gipor ki deyo ma kibinyutu botwa. 19Pien jami acweya ducu gitye kakuru nyute pa lutino pa Lubanga ki miti madwong ma okato kare. 204 Jami acweya ducu onongo yam kiketogi ite twero me gin ma tere peke, pe pi mitigi ken gi, ento pi miti pa Lubanga mayam oketo ite twero meno kun en geno ni 21ceng mo kibigonyo jami acweya ducu woko ki i opii me to, wek gunong kuc ki deyo ma kimiyo ki lutino pa Lubanga. 22Wangeyo ni jami ducu ma kicweyogi acweya, gubedo kacur acura ki arem nio wa ikareni. 235 Pe gin keken, wan bene ma kimiyowa Cwiny Maleng macalo mot mukwongo, ma nyutu gin ma kibimiyowa i anyim, wan bene watye kacur acura ki i iwa kun wakuru kare me lokowa wek wadok lutino pa Lubanga, en aye me koko komwa. 24Pien yam kilarowa pi bedo ki gen man. Pimeno gen ma kome nen nongo pe dong gen. Anga ma geno gin ma en neno kome? 25Ento kace watye ki gen me nongo gin ma pe waneno kome, ci wakuru gin meno kun wadiyo cwinywa.

26Ikit acelu Cwiny Maleng bene konyowa kama wagoro iye. Pe wangeyo lego Lubanga ikit ma myero waleg kwede, ento Cwiny kikome bako doge ma kakawa, ki cur ma lokdog pe twero waco. 27Ngat ma ngiyo cwiny dano ngeyo tam pa Cwiny Maleng, pien Cwiny Maleng bako doge pi jo pa Lubanga kun lubu gin ma Lubanga mito.

28Wangeyo ni i gin ducu Lubanga tiyo pi kelo gin maber ki jo ducu ma gimare, jo ma en olwongogi kit macalo en oyubu. 29Jo mayam en ongeyogi con, omoko bene ni myero guloke wek gukwo calo Wode, wek omii Wode obed latin kayo ikin utmego mapol. 30Jo mayam en oyerogi con, gin aye bene en olwongogi, jo ma en olwongogi, en bene okwanogi ni kitgi atir; jo madong en okwanogi ni kitgi atir en bene omiyo deyone botgi.

Mar pa Lubanga matye i Kricito

31Wabiwaco ango mono dok ikom lok man? Ka Lubanga tye tung botwa, ci anga ma lakworwa? 32En yam pe okwero jalo Wode kikome ento omiye pi wan ducu. Dong pe en bimiyowa jami ducu kacel kwede? 33Anga mono ma bikelo adot ikom jo ma Lubanga dong otyeko yerogi? Lubanga aye ma kwanogi ni kitgi atir. 34Anga kono matwero ngolo kop loyowa? Pe tye ngat mo! Pien Kricito Yecu mayam oto, dok bene yam kicere woko, en tye obedo i kabedo me deyo kanget Lubanga tung acuc, en aye ma bako doge pirwa. 35Anga ma bipokowa ki ikom mar pa Kricito? Neno can, nyo kumu, nyo ayelayela, nyo kec, nyo bedo munero, nyo gin marac, nyo pala lucwan? 366 Kit macalo yam kicoyo kwede kit man,

“Kibedo kanekowa dyeceng jwi piri,

kiterowa macalo romi me aneka.”

37Ento i gin magi ducu watye kaloyogi matek pi ngat ma ceng omarowani. 387 Pien angeyo ada ni, kadi to, kadi kwo, kadi lumalaika, kadi luloc, kadi gin matye ikare man, kadi gin ma mito bino, kadi teko, 39kadi gin matye malo, kadi gin matye piny, kadi ki gin mo keken ikom ginacweya ducu, pe bibedo ki twero mo me pokowa woko ki ikom mar pa Lubanga matye i Kricito Yecu Rwotwa.