Jo Roma 6:23

To ki tung bot bal ki kwo tung bot Kricito

1Wan mono dok wabiwaco ango? Myero wamede ki timo bal wek kica onya? 2Pe kitmeno! Pien wan madong yam wato woko ki tung bot bal dok watwero bedo kwo i bal ningning? 3Pe wungeyo ni wan ducu ma kityeko batijawa me donyo i Kricito onongo kibatijawa me donyo wa itone bene? 41 Kiyikowa kacel ki Kricito i to i batija ma walimo, wek wabed calo en. En yam ocer woko ki ikin jo ma oto pi deyo pa Wone, wek wan bene dong wanong kwo manyen.

5Pien ka dong waribe kacel kwede i to mo ma cal ki toneni, kitmeno bene wabiribe kwede i cer ma cal ki cer ma kicero en kwedeni. 6Pien wangeyo man ni, kwowa macon ca yam kigure kwede kacel ikom yatariya, wek kwo me bal ma onongo watye kwede ogik woko, wek wan dok pe wadok opii me bal. 7Pien ngat ma oto, nongo dong kigonyo woko ki ite twero me bal. 8Ento ka dong wato kacel ki Kricito, waye ni wabibedo kwo kacel kwede bene. 9Pien wangeyo ni Kricito mayam dong ocer ki ikin jo ma otoni pe dok bito; to dong peke ki loc mo ikome. 10To ma en oto, oto pi bal, tyen acel keken, ento kwo ma en kwo kwede, kwo pi Lubanga. 11I yo acelu, wun bene kitmeno myero wukwane kekenwu ni, wun jo ma oto tung bot bal, ento wubedo kwo kacel ki Lubanga.

12Pe wuwek bal oloo komwu ma to wokoni, wek pe omii wubed kalubu miti me komwu. 13Pe dok wumii dul komwu mapatpat itimo bal, macalo jami tic me tiyo gin marac; ento wumiine kenwu bot Lubanga calo jo ma gua woko ki i to, madong guo i kwo. Wumii dul komwu ducu bot Lubanga me tiyo gin matye atir. 14Pien bal pe dok bibwoyowu, pien wun dong pe wutye ite cik, ento wutye ite kica pa Lubanga.

Opii me kit ma atir

15Gin ango dok kono? Dok wamede watimu bal, pien ni wa peke ite cik ento ite kica? Pe kitmeno gire! 16Pe wungeyo ni ka dong wumiine kenwu bot ngat mo calo opii me winyo gin ma en loko, nongo dong wudoko opii pa ngat ma wuwinyo lokeni? Nyo wudoko opii me bal ma terowu i to, nyo wudoko opii me winyo lok pa Lubanga, ma telowu ikit ma atir. 17Ento wamiyo pwoc bot Lubanga, pien yam wubedo opii me bal, ento dong wutye kalubu kit pwony ma kipwonyowu kwede ni wulube ki cwinywu ducu. 18Dong kityeko gonyowu woko ki i opii me bal, wudoko opii me kit ma atir. 19Atye kalok macalo dano adana, pi gorowu ma kinywalowu kwede. Pien macalo yam wumiyo dul komwu ducu me bedo opii me tim caro ki tim maracu, omiyo dong wudoko lutim maracu, kombedi dong wumii dul komwu ducu gubed opii me kit ma atir, wek wudok jo maleng.

20Ikare ma onongo pud wubedo opii me bal, onongo pe wubedo ite loc me kit ma atir. 21Yam wunongo gin ango maber ikom gin ma lewice kombedi tye ka makowu iyeni? Agiki pa jami macalo meno ducu aye to. 22Kombedi dong kigonyowu woko ki i opii me bal, dong wudoko opii pa Lubanga; gin ma wunongo en aye ni wudoko dong jo maleng, agikine en kwo ma pe tum. 23Pien mucara me bal en to, ento mot ma Lubanga miyowa nono, en aye kwo ma pe tum i Yecu Kricito Rwotwa.