Niyabo 7

Kiketo lanyut ikom jo Icrael 144,000

11

Lacen ki inge man aneno lumalaika angwen gucung ibut lobo angwen ducu, ma gin gengo yamo me lobo woko, wek yamo mo pe okod i lobo, nyo i nam, kadi ki ikom yat mo. 2Dok aneno lamalaika mukene ma ito cito malo ki kama ceng tuc ki iye, onongo tye ki lanyut pa Lubanga makwo. Ci okok ki dwon malongo bot lumalaika angwen ma onongo kimiyogi twero me balo lobo ki nam. 32 En owaco ni, “Pe wubal lobo nyo nam kadi ki yadi, nio wang madong waketo lanyut itur nyim lutic pa Lubangawa.” 4Ka dok awinyo bene wel dano ma kiketo lanyut ikomgi, gubedo dano alip miya acel ki pyere angwen wiye angwen, ma gua ki i kaka pa jo Icrael ducu. 5Ikaka pa Juda kiketo lanyut ikom dano alip apar wiye aryo. Ikaka pa Reuben kiketo lanyut ikom dano alip apar wiye aryo. Ikaka pa Gad kiketo lanyut ikom dano alip apar wiye aryo. 6Ikaka pa Acer kiketo lanyut ikom dano alip apar wiye aryo. Ikaka pa Naputali kiketo lanyut ikom dano alip apar wiye aryo. Ikaka pa Manace kiketo lanyut ikom dano alip apar wiye aryo. 7Ikaka pa Cimeon kiketo lanyut ikom dano alip apar wiye aryo. Ikaka pa Levi kiketo lanyut ikom dano alip apar wiye aryo. Ikaka pa Icakar kiketo lanyut ikom dano alip apar wiye aryo. 8Ikaka pa Jabulon kiketo lanyut ikom dano alip apar wiye aryo. Ikaka pa Yucepu kiketo lanyut ikom dano alip apar wiye aryo. Ikaka pa Benjamin kiketo lanyut ikom dano alip apar wiye aryo.

Lwak dano ma gua ki i rok ducu

9Lacen ki inge man aneno lwak dano mapol ata, ma ngat mo pe romo kwano welgi, ma gua ki i rok ducu, ki i kaka ducu, ki dano ducu me wi lobo, ki leb ducu, ma gucung inyim komker ki inyim Latin romo, kun guruke ki jor matar, ma gumako jang otit i cinggi. 10Gin gudange ki dwon malongo ni, “Laro dano tye bot Lubangawa ma obedo iwi komker, ki bot Latin romo!” 11Lumalaika ducu onongo gucung gurumu komker woko dyere, gurumu bene ludongo ki lee makwo angwen ni, ka guryebe piny inyim komker ci guworo Lubanga, 12kun giwaco ni, “Amen! Pak ki deyo, ryeko ki pwoc, woro, twero ki teko obed bot Lubangawa nakanaka. Amen.”

13Ci ngat acel ki ikin ludongo oloko kweda, kun penya ni, “Jo magi ma guruku jor matar ni gin angagi, gua kono ki kwene?” 143 Adoke iye ni, “Ladit, in ingeyo.” En dok owaco bota ni, “Magi aye gin jo ma gua ki i can madit atika, gin bene dong gutyeko lwoko jorgi ki remo pa Latin romo odoko matar adada. 15Pimeno, dong gitye inyim komker pa Lubanga, ma gitiyo bote i ode dyeceng ki dyewor; ngat ma obedo iwi komker bibedo ikin gi kun gwokogi. 164 Kec pe dok binekogi, kadi orwo pii bene pe dok binekogi, ceng pe dok biwangogi, kadi kit lyeto mo bene. 175 Pien Latin romo matye i dye komker bibedo lakwatgi; en bitelogi terogi iwang it me pii me kwo, Lubanga bene bidunyo pig wanggi woko ducu ki i wanggi.”