Niyabo 5

Buk adola ki Latin romo

11

Ci dok aneno buk adola tye itung cing ma lacuc pa ngat ma obedo iwi komkerni, ma kicoyo woko ducu ryoryo, tung iye wa ki itung ngeye bene, dok kimwono ki ginamwona ma kidodo tyen abiro. 2Dok aneno lamalaika mo matek tutwal ma onongo tye katito lok ki dwon malongo ni, “Anga ma myero me muku kama kimwononi, kiyabo buk adolani?” 3Pe tye ngat mo iwi polo, kadi iwi lobo, kadi piny ite lobo matwero yabo buk adola ni kadi wa neno iye bene. 4Ci akok matek pien pe kinongo ngat mo ma myero me yabo buk adola nyo kadi me neno iye. 52 Cutcut ngat acel ikin ludongo owaca ni, “Pe ikoki. Nen! Labwor ma i kaka me Juda, Lwit yat pa Daudi, en aye dong oloyo, pimeno en twero muku gin amwona abiro ma ki dodo iwi wadi matye i buk adolani woko ci biyabone.” 63

Lacen dok aneno Latin romo ma ocung ikin komker ki lee makwo angwen ki ikin ludongo, manen calo dong kineko woko. Onongo tunge tye abiro, ki wange bene tye abiro, ma gin cwiny pa Lubanga abiro, ma en ocwalo iwi lobo ducu. 7Ci en ocito okwanyo buk adola woko ki itung cing ma lacuc pa ngat ma onongo obedo iwi komker ni. 8Ikare madong en okwanyo buk adola ni woko, ci lee makwo angwen ni ki ludongo pyere aryo wiye angwen ni guryebe piny inyim Latin romo, kun ngat acel acel ikin gi omako nanga, ki atabo jabu ma gupong ki odok eceta, ma en aye lega pa jo pa Lubanga. 94 Ci gubedo ka wero wer manyen ma waco ni,

“In imyero me kwanyo buk adolani,

ki me yabo lamwon ma kimwono kwedeni,

pien yam kineki woko, dong ki remoni ilaro dano me dwokogi bot Lubanga,

lwak ma a ki i kaka mapol mapatpat, ki

ileb ki rok mapatpat ducu, 105

ilokogi gudoko lwak pa Lubanga ma en loyo,

ma gin aye dong ajwaki ma gitiyo bote,

gin bene gibiloyo lobo.” 116

Ka dong aneno, ci awinyo dwon lumalaika ma welgi pe kwane, alip ki alip, ma gurumu komker woko, ki lee makwo ki ludongo, 12kun giloko ki dwon malongo ni,

“Latin romo ma kineko ni en aye ma myero

me nongo twero, lonyo, ryeko, teko,

woro, deyo kacel ki pwoc!”

13Ka dok awinyo ginacweya ducu matye i polo, iwi lobo, ki piny ite lobo, ki ma gitye i nam gu ki gin ducu matye iye, ma giloko ni,

“Pwoc ki woro, deyo ki twero obed nakanaka

bot en ma obedo iwi komker, ki bot Latin romo!”

14Ci lee makwo angwen ni gugamo ni, “Amen!” Ci ludongo guryebe piny guworo Lubanga ki Latin romo.