Niyabo 4

Woro Lubanga i polo

1Lacen ka man otum, ci dok aneno dogola mo i polo ma onongo tye twolo. Dong dwon mukwongo ma onongo awinyo obedo kalok kweda calo koko tum kun, waco bota ni, “It ibin malo kany, ci abinyuti gin ma bitime lacen inge man.” 21 Cutcut Cwiny Maleng oyutu tama woko, ci aneno komker ma kicibo i polo, ma dano mo onongo obedo iwiye. 3Ngat ma onongo obedo iwi komker ca onongo ryeny calo got me wel matare ki makware, ki danyu manen calo got me wel me emeradi orumu komker woko dyere. 4Ka dok komker mukene pyere aryo wiye angwen orumu komkere woko dyere, ki ludongo pyere aryo wiye angwen bene gubedo iwi komker magi, ma guruku bongi matar, kun gurwako bene lalukana me jabu me deyo iwigi. 52 Onongo tye gin mo ma wil awila calo lutkot ki ikom komker ni, ki dwon mapol winye iye, ki gin ma mwoc amwoca calo mwoc pa kot. Inyim komker onongo tye iye dog mac abiro matye kalyel, ma gin aye cwiny pa Lubanga abiro. 63 Inyim komker meno onongo tye iye gin manen calo nam me kiyo maleng calo gweng ma mil amila.

Dok lee makwo angwen gurumu komker woko dyere tungi ki tungi, wanggi pol ma mogo tye tung nyimgi ki mogo tye tung ngegi.4 7Lee makwo mukwongo onongo nen calo labwor, ki me aryone onongo nen calo twon dyang, lee makwo me adeke wange nen calo wang dano, ki lee makwo me angwene onongo nen calo ocur matye ka tuk. 85 Dong lee makwo angweni onongo lee acel acel bwome tye abicel, ma wanggi nongo pol ata, ma oromo komgi woko ducu ki tung woko wa ki tung i iye bene. Dyeceng ki dyewor pe giweko wer ni,

“Rwot Lubanga Matwero ducu leng, leng dok leng,

en ngat mayam tye con, tye kombedi, dok bibino!”

9Ikare ducu ka lee makwo ni gimiyo deyo ki woro ki pwoc bot ngat ma obedo iwi komker ca, ma bedo kwo nakanaka, 10ci ludongo pyere aryo wiye angweni giryebe piny inyim en ngat ma obedo iwi komker ca, ci giworo en ngat ma bedo kwo nakanakani; dok gibolo lalukanagi inyim komker kun giwero ni,

11“Rwotwa ki Lubangawa,

in imyero me nongo deyo ki woro ki teko,

pien in aye mayam icweyo jami ducu,

dok bene pi miti ni omiyo gubedo tye,

meno aye gin ma omiyo yam kicweyogi.”