Niyabo 2

Lok ma kicwalo bot Kanica me Epeco

1“Bot lamalaika pa kanica matye i Epeco coo kit man ni: Man lok pa ngat ma omako lakalatwe abiro i cinge tung lacuc, matye kawire i dye okar mac abiro me jabu.

2Angeyo ticwu ducu, ki kit ma wucane kwede ki kit ma wudiyo kwede cwinywu. Angeyo bene kit macalo pe wutwero ciro kwede tim pa jo maracu, ento wutemo jo ma gilwonge ken gi ni gin lukwena, kun gin gigi pe lukwena, ma omiyo bene dong wunongo ni gin lukwena ma lugoba. 3Angeyo wutye kadiyo cwinywu, kun wuciro can pi nyinga, dok bene pud pe wuol gire. 4Ento atye ki lok man ikomwu, pien dong wuweko mar ma onongo yam wutye kwede mukwongo ca ni woko. 5Kong wupo kit macalo onongo wupoto kwede ki i kabedo mamalo mayam wuo iye ni, ka dong wungut, ci wucak tiyo gin ma onongo wubedo katiyone ikare mukwongo ca. Ka pe wungut, ci abibino botwu ka kwanyo lacib macwu woko ki i kabedone. 6Gin maber ma onen botwu en aye ni, wudag tic pa jo Nikolaiti ma an bene adagi ni. 71 Ngat ma ite tye myero owiny lok ma Cwiny Maleng oloko bot lwak ducu ma guye an. Abimiyo ngat ma oloyo camo nyig yat me kwo matye i poto pa Lubanga.”

Lok ma kicwalo bot Kanica me Cumurna

82

“Bot lamalaika pa kanica ma gitye i Cumurna coo kit man: Man lok pa ngat ma obedo mukwongo ki me agikine, ngat mayam oto ka dok ocer woko odoko kwo ni. 9Angeyo kit ayelayela ducu ma wutye ka cirone, ki can lim bene ma wutye kwede (ento wun wulony). Angeyo bene yet pa jo ma gin waco ni gin Lujudaya, kun i adane gin pe Lujudaya, ento gin gubedo lwak me dul pa Catan. 10Pe wulwor can ma bipoto ikomwu. Nen, Catan bikwanyo jo mogo ki ikinwu bologi woko i buc wek etemwu. Gibibedo ka yelowu pi nino apar. Wubed jo ma lugen nio wa i to, ci abimiyowu lalukana me deyo me kwo. 113 Ngat ma ite tye myero owiny lok ma Cwiny Maleng oloko bot lwak ducu ma guye an. Ngat ma oloyo, to me aryo dong pe biketo arem ikome.”

Lok ma kicwalo bot Kanica me Pergamo

12“Bot lamalaika pa kanica ma gitye i Pergamo coo kit man: Man lok pa ngat matye ki pala lucwan mabit ryoryo. 13Angeyo kama wubedo iye, kama kom pa Catan tye iye. Wun girwu wumako nyinga woko matek liking, pe wukwero niyewu ikoma, kadi ki ikare pa Antipac ma obedo cadena me ada, dano ma lagen mayam kineko ikinwu, kama Catan bedo iye. 144 Ento atye ki lok mogo manoknok ikomwu, pien wutye ki jo mogo kunu ma gumako pwony pa Balaam, mayam opwonyo Balak me keto ariya inyim jo Icrael wek gupot i bal, kun obitogi ni gucam ringo ma kityero bot jogi, ki me timo tim tarwang. 15Kitmeno, wun bene wutye ki jo mogo ma gumako pwony pa jo Nikolaiti. 16Kace pe wungut, ci abibino botwu oyotoyot, ka dong alwenyo kwedwu ki pala lucwan me doga ni. 175 Ngat ma ite tye myero owiny lok ma Cwiny Maleng oloko bot lwak ducu ma guye an. Ngat ma oloyo abimiye manna mono ma onongo kikano woko, abimiyo got matar bene bote, ki nying manyen ma kicoyo ikom got meno ma ngat mo pe ngeyo, kono en ngat ma gamo ni keken aye ngeyo.”

Lok ma kicwalo bot Kanica me Tuatira

18“Bot lamalaika pa kanica ma gitye i Tuatira coo kit man: Man lok pa Wod pa Lubanga ma wange calo leb mac ma lyel, ki tyene ducu calo nyonyo bronze ma kirudu maleng adada. 19Angeyo ticwu ducu, mar ma wutye kwede, niyewu ki ticwu me konyo dano, ki kit ma wudiyo kwede cwinywu. Angeyo ni ticwu ma kombedi wutye katiyone kato me kare mukwongo ca. 206 Ento atye ki lok man ikomwu, pien pud wukanyo dako ca, Jejebel, ma lwonge kene ni en lanebini, kun tye ka pwonyo lutica miyo gingak woko i yo me tim tarwang, ki camo ringo mogo ma nongo dong kityero woko bot jogi. 21Onongo amiyo bote kare me ngut, ento en okwero ngut woko ki ikom tim tarwangeni. 22Nen, abibolo dako meno iwi kitanda ma nongo two marac, pacoge bene abibologi woko i can madit atika, ka pe gungut, ma gukwero lubu tim tarwang pa dako meno. 237 Abineko jo malube woko bene, wek lwak ma guye an i kabedo ducu gunge ni an angiyo cwiny dano wa ki tamgi, dok abimiyo bot dano acel acel ikinwu gin malube ki kit tic ma en otiyo.

24Ento bot wun jo mukene ma wutye i Tuatira, ma pe wulubu kit pwony man, dok bene pe wupwonyo gin mo ma kilwongo ni ‘Mung matut pa Catan,’ dong atito botwu ni, pe doki abimedo yec mo mukene botwu. 25Ento wumak gin ma wutye kwede ni aye matek liking, wang ma an adwogo. 268 Ngat ma biloyo, dok ma bibedo katiyo tica nio iagiki, abimiye twero me loyo lurok. 27En biloyogi ki odo nyonyo, calo ngat ma goyo agulu ngidogi woko matinotino, kit macalo an bene alimo twero ki bot Wora; 28an abimiye latwok bene. 29Ngat ma ite tye myero owiny lok ma Cwiny Maleng loko bot kanica mapatpat.”