Niyabo 16

Atabo me akemo pa Lubanga

1Dok awinyo dwon mo malongo ma oa ki i Ot pa Lubanga kun waco bot lumalaika abiro ni, “Wucit wuony akemo pa Lubanga matye i atabo abiro ca ni woko i lobo.” 21

Lamalaika mukwongo ocito oonyo gin ma i atabone woko i lobo. Ci two bur maracu ma toko kom dano atoka omako jo ma lanyut pa lee ca tye ikomgi ma giworo cale beneni.

3Lamalaika me aryone oonyo gin ma i atabone woko i nam, ci oloke odoko calo remo pa dano ma oto, ki gin makwo ducu ma onongo gitye i nam guto woko. 42

Lamalaika me adeke oonyo gin ma i atabone i kulu ki iwang it gu ducu ci gin ducu guloke gudoko remo. 5Cutcut awinyo lamalaika maloyo pii ka waco ni, “Kop ma ingolo ni ingolo giri atir, in ngat matye, yam bene ibedo tye con, in Ngat Maleng. 6Pien jo ma guoyo remo pa joni maleng, ki remo pa lutit loki, in bene imiyo botgi remo me amatagi. Can ma imiyogi oporo kakare pi gin ma gutimo.” 7Dok awinyo dwon ma a ki i keno tyer ka dange ni, “Ada, Rwot Lubanga Won Twer Ducu, kop ducu ma ingolo bedo ada dok atir!”

8Lamalaika me angwene oonyo gin ma i atabone woko ikom ceng, dok bene kiye ni owang dano woko ki lyeto mager me ceng marom ki lyeto mac. 9Lyeto mager tutwal owango dano atika, ma omiyo dano guyeto nying Lubanga matye ki twero ikom gemo magi, pe gungut dok bene pe gumiyo deyo bote. 103

Lamalaika me abic oonyo gin ma i atabone woko ikom komker pa lee ca, ci kere dong ocako bedo i colpiny; pi arem madwong omiyo dano gukayo lebgi ma pe wace. 11Gin oyeto Lubanga me polo pi arem ki bur ma otoko komgi woko, dok bene pe gungut ikom tim maracu ma gutimo. 124

Lamalaika me abicele oonyo gin ma i atabone woko i kulu madit Euprate, ci piine otwo woko pi yubu yoo pi wot pa luker ma gia ki tung kunyango. 13Lacen aneno cen adek ma gubedo calo ogwal ma okati ki idong min kulu, ki i dog lee, ki i dog lanebi ma lagoba. 14Gin gubedo cen pa jok ma tiyo tic mogo me aura tutwal. Ma bene giwoto bot luker me wi lobo ducu ka cokogi woko kacel pi mony inino madit pa Lubanga Won Twer Ducu. 155 (Nen, abibino macalo lakwo! Dano ma bedo ma wange twolo kun kiyo piny tye ki gum, ma kun nongo gwoko bongine, wek pe ewot munero, ma dano gineno kome ma pe eruku iye bongo!) 166 Gucoko luker kacel i kabedo ma kilwongo i leb Ibru ni Armagedon.

17Lamalaika me abirone dong oonyo gin matye i atabone i dye yamo, ci dwon mo madit oa ki i Ot pa Lubanga, ki iwi komker kun waco ni, “Dong otime!” 187 Ci lutkot ocako wil awila, dok mor winye matek, ki mwoc pa kot, ki oyengyeng madit oyengo piny, kit oyengyeng mo ma peya yam onen nicake ma dano gubedo i lobo; oyengyeng meno obedo dit adada. 198 Oweko taun maditi obare opoke dul adek, taun madito pa lurok ducu gumuk gupoto woko piny. Ci Lubanga opo pi Babilon ma en taun madit, pi miye ni omat kongo bwino ikikopo me akemone mager. 209 Ma omiyo cula nam ducu gurwenyo woko, ki godi ducu bene dong gurwenyo woko ma pe dong giromo nongogi. 2110 Pee mapek tutwal ocore ki i polo opoto ikom dano, kun pek pa nyig pee acel acel onongo cokcok romo kilogram pyere abic. Man oweko dano guyeto Lubanga pi gemo man me pee ni, pien gemo meno onongo obedo rac ma okato kare.