Niyabo 14

Latin romo ki jone

11

Lacen dok aneno Latin romo ma ocung iwi got Cion; onongo jo alip miya acel ki pyere angwen wiye angwen tye kacel kwede, madong onongo kicoyo nyinge ki nying Wone woko itur nyimgi. 2Ci awinyo dwon mo oa ki i polo mamor calo pii matye ka cure, ki dok calo kot matye kamor matek. Dwon ma awinyo ca onongo obedo calo dwon lugo nanga matye ka goyo nangagi. 3Onongo gitye ka wero wer manyen inyim komker, ki inyim lee makwo angwen ni, ki inyim ludongogu bene. Pe tye ngat mo ma onongo twero pwonyo wer meno, kono jo alip miya acel ki pyere angwen wiye angwen ca keken madong kikokogi woko ki i lobo. 4Magi aye gin jo ma pe gubalo komgi ki timo tim tarwang ki mon, pien gugwoke gubedo jo maleng; dok bene gin jo ma lubu Latin romo kama en woto iye ducu. Jo magi aye gin jo ma kikokogi ki ikin dano ducu, wek gubed calo cam mukwongo cek ma giyubu pi Lubanga ki Latin romo. 52 Pe ki winyo lok goba mo idoggi; gubedo labongo roc mo ikomgi.

Lumalaika adek

6Dok aneno lamalaika mukene tye ka tuk wire i dye polo; onongo tye ki lok me Kwena Maber ma labed naka me atita bot jo ma gibedo iwi lobo, bot rok ducu ki kaka ki leb gu ki jo mapatpat ducu. 7Ci oloko ki dwon malongo ni, “Wulwor Lubanga, wumii deyo bote, pien karene me ngolo kop dong oromo. Wuwor en ngat ma oketo polo ki lobo ki nam ki wang it gu.” 83

Lamalaika mukene me aryone dok olubu kor lawote, kun waco ni, “Babilon madit dong opoto, opoto gire woko, en gang mayam omiyo rok ducu mato kongo bwino me time me tarwangngi.”

9Lamalaika mukene me adeke dok olubu korgi, kun loko ki dwon malongo ni, “Kace ngat mo oworo lee nu ki calle, ma nongo giketo poyo itur nyime nyo i cinge, 104 ci en bimato kongo bwino me akemo pa Lubanga, ma oonyo i kikopo me kinigane ma pe girubu ki pii, gibibedo ka une ki mac ki gweng calfa ma mac oliyo woko, inyim lumalaika maleng ki inyim Latin romo bene. 115 Yito mac ma kiunugi kwede bedo ka duny nakanaka cito malo, kun pe giywe i dyeceng wa idyewor bene, gin jo ma giworo leenu ki calle, kadi wa ngat madong kiketo poyo me nying lee meno ikome.”

12Meno aye kama jo pa Lubanga myero gunyut iye kit ma giciro kwede can, gin jo ma gwoko cik pa Lubanga ki niyegi ikom Yecu Kricito.

13Dok awinyo dwon mo oa ki ipolo ma waco ni, “Co lok man ni: cake kombedi jo ma to ma nongo gitye i Rwot tye ki gum.” Cwiny Maleng bene omoko lok man kun waco ni, “Adada kitmeno, dong gibiywe ki i tic matek mayam gubedo katiyone, pien ticgi mayam gutiyo ni lubu korgi.”

Kayo kac me lobo

146

Lacen doki aneno pol matar, ki ngat mo obedo iwi pol ma cal ki wod pa dano. Lalukana jabu onongo tye iwiye, ki pala kac mabit bene onongo tye i cinge. 157 Ka dok lamalaika mukene okati ki i Ot pa Lubanga, kun dange matek bot ngat ma onongo obedo iwi pol ni, “Cwal cingi i kaa kac ki pala kaci, pien kare me kac dong oromo, ki gin ma kikayo i lobo bene dong ocek woko.” 16Kitmeno ngat ma onongo obedo iwi pol oryeyo cinge i lobo ki pala kac, ci okayo gin ma ocek i lobo.

17Lamalaika mukene doki okati ki i Ot pa Lubanga matye i polo, en bene onongo omako pala kac mabit. 18Lamalaika mukene dok oa ki inget keno tyer obino; lamalaika meno onongo tye ki twero ikom mac. Ci odange matek bot ngat ma onongo tye ki pala kac mabit ca ni, “Cwal cingi ki pala kaci ci icok nyig olok me lobo, pien nyige dong ocek woko.” 19Kitmeno lamalaika oryeyo cinge i lobo ki pala kac, ci ocoko olok ducu me lobo, oonyo woko ibur madit me biyo pig olok me akemo pa Lubanga. 208 Ci kinyono bur me biyo olok meno woko inge gang, remo omol ki ibur me biyo olok, ma bore romo mairo miya aryo, ki tute piny onongo mito romo cokcok puti abic.