Niyabo 12

Dako ki min kulu

1Lanyut mo madit adada onen i polo, dako mo ma onongo oruku ceng, kun dwe tye ite tyene, ki lalukana ma onongo en oruku iwiye obedo lakalatwe apar wiye aryo. 2Dako nu onongo tye ki ic, ma onongo dong cok nywal; cutcut arem me nywal ogoyo en oweko omuke ki koko, kun pwode apwoda ki arem me nywal madong mito nywalo latin woko. 31 Ci lanyut mo mukene dok onen i polo, min kulu mo makwar madit otuc, ma onongo wiye tye abiro, ki tunge tye apar, kun onongo lalukana abiro me loc tye iwiye ducu. 4Yibe opwodo dul acel me adek pa lakalatwe me polo, ci ocorogi woko piny i ngom. Ka dong min kulu madit ca ocako cung inyim dako ma onongo mito nywal ca, wek ka dakonu onywal, ci emwony latine woko. 52 Ci dakonu cut onywalo latin awobi, en ngat ma biloyo rok ducu ki odo nyonyo. Ento latin meno kigamo woko, kitero bot Lubanga ki i komkere. 6Ci dakonu oa oringo woko i dye tim, kama Lubanga oyubu iye kabedo pire, kama ki bibedo ka pite iye pi nino alip acel ki miya aryo ki pyere abicel. 73

Ikare meno cutcut lweny ocake iwi polo, Mikael kacel ki lumalaikane gulwenyo ikom min kulu madit ti. Min kulu maditi kacel ki lumalaikane bene gulwenyo, 8ento kiloyogi woko, ma omiyo kabedo dong odoko pe pirgi iwi polo. 94 Ci kibolo min kulu madit ca woko piny i ngom, mayam obedo min kulu macon ca, ma kilwongo ni Ladot, ki Catan, ma bwolo dano ma iwi lobo ducu; kibole woko piny i ngom kacel ki lumalaikane. 105 Cutcut awinyo dwon mo malongo i polo ma waco ni, “Kombedi dong laro dano, ki teko, ki ker pa Lubangawa ki twero pa Kricito dong oo, pien ngat mayam doto utmegiwani dong gibolo woko piny i ngom, en ngat mayam dotogi inyim Lubangawa dyeceng ki dyeworni. 11Gin dong guloye woko pi remo pa Latin romo, ki pi lok me caden ma gubedo ka tucune, dok bene pe guparo pi kwogi, ento gumine ken gi kadi wa i to. 12Bed ki yomcwiny, in polo, ki wun bene ma wubedo iye! Ento wun lobo ki nam, wubineno can malit atika, pien Ladot dong olor obino woko piny botwu matye ki akemo madwong, pien ngeyo ni karene tye manok!”

13Ikare ma min kulu dong onenoni kibole woko piny i ngom, ci ocako ryemo dako ca ma onongo onywalo latin awobini. 146 Ento kimiyo bwom ocur madito aryo bot dakonu, wek oa woko ki inyim min kulu, otuk ocit woko i dye tim, i kabedone kunu kama gibipite iye pi mwaka adek ki nucu. 15Ci min kulu ongoko pii ki idoge i kor dakonu, piine obedo calo pii me kulu, wek pii opong omol dakonu woko. 16Ento lobo okonyo dakonu, lobo ongamo doge ci omwonyo kulu meno ma onongo min kulu ongoko woko ki i dogeni. 17Kiniga omako min kulu ikom dakonu, ci ocito oero lweny ikom likwayo pa dako ca mukeneni ducu ki, ikom jo ma gilubu cik pa Lubanga, ma gimako bene lok me caden ma Yecu omiyo. 18Ka dong ocung ikweyo me dog nam.