Niyabo 10

Lamalaika ki buk adola matidi

1Dok aneno lamalaika mukene matek tutwal oa ki i polo kun lor bino piny. Oruke woko ki pol, ma onongo danyu tye iwiye, wange onongo obedo calo ceng, ki tyene onongo obedo calo wir mac. 2Onongo buk adola matidi tye i cinge ma iye oyabe woko. Oketo tyene tung lacuc i nam ki tyene tung lacam oketo iwi lobo. 3Odange ki dwon malongo calo labwor ma moro dwone. Ikare ma en odange, ci lutkot omwoc maromo tyen abiro kulu. 4Ma lutkot dong omwoc tyen abiro, ci ayube ka coc, cutcut acako winyo dwon ma a ki i polo kun waco ni, “Kan mung me lok ma lutkot abiro ni guwaco woko, pe i co piny.” 51 Ci lamalaika ma onongo aneno ocung i nam ki i loboni otingo cinge ma lacuc malo i polo, 6ka okwongo kwong ki nying ngat ma bedo nakanaka, ma ocweyo polo ki jami ducu matye iye, ki lobo ki jami ducu matye iye, kacel ki nam ki jami ducu matye iye kun waco ni, “Agalagala mo dong peke, 7ento ka kare oromo ma lamalaika me abiro bikutu tume, Lubanga bicobo tame matye i mung kit macalo yam otito bot lutice ma lunebi.” 82

Doki awinyo ka dwon ma onongo oa ki i poloni tye kalok kweda tyen me aryo kun waco ni, “Cit ikwany buk adola ma oyabe matye i cing lamalaika ma ocung iwi nam ki i lobo ni.” 9Ci acito bot lamalaika meno, atite ni omiya buk adola matidi ni; ci en ogamo owaca ni, “Gam icam woko. Bibedo kec i ii, ento bibedo lim i dogi calo moo kic.” 10Cutcut agamo buk adola matidi ni woko ki i cing lamalaika ci acamo woko. Obedo lim idoga calo moo kic, ento ikare madong atyeko camone, obedo makec i iya. 11Ka dong kiwaca ni, “In myero doki itit lok pa Lubanga, ikom lwak dano mapatpat ki rok ki leb ki luker ducu.”