Jabuli 91

Lubanga aye lagwokwa

1Ngat ma bedo i kakane pa en Mamalo Twal,

ki ma bedo ite gwok pa Won Twer Ducu,

2en biwaco bot Rwot ni, “In aye kalarena ki cela,

in Lubangana ma ageno.”

3En aye ma bilari ki i owic ma kiciko me maki,

ki i two gemo maracu ma neko dano.

4En biumi ki bwome,

ibiringo kalare ite bwome,

genene en aye kwot ki gin ma gengo kori.

5Pe ibilworo gin marac i dyewor,

nyo kadi atero ma gicelo i dyeceng,

6kadi two gemo ma neko dano atura i colpiny,

nyo can ma poto nekogi i dyeceng.

7Jo alip gitwero to ka ngeti,

ki jo alip apar i tung cingi ma lacuc;

ento gin mo pe bigudu komi.

8Ibineno ki wangi keken,

kit pwod ma kibipwodo ki lutim maracu.

9Pien dong imiyo Rwot odoko kalareni,

en Mamalo Twal dong odoko kabedoni,

10pimeno can mo pe bipoto ikomi,

kit gemo mo bene pe bibino cok ki kemani. 111

Lubanga biciko lumalaikane piri

me gwoki kama iwoto iye ducu. 122

Gin gibijoli ki cinggi,

wek pe iyok tyeni ikom got. 133

Ibinyono labwor ki ororo,

ibitoro latin labwor ki twol piny i ngom ki tyeni.

14Lubanga owaco ni, “Abilaro jo ducu ma mara,

ki abigwoko, jo ducu ma ngeya ni an a Rwot.

15Ka gukok bota, ci abigamo doggi;

abibedo kwedgi ikare me can,

abilarogi dok abiketo deyo ikomgi.

16Abimiyogi mot me bedo ki kwo ma rii pi mwaka mapol i lobo,

ci abimiyo gingeyo ni an aye alaro dano.”