Jabuli 90

BUK ME ANGWEN

Jab 90—106

Goro pa dano ki teko pa Lubanga

1Rwot, in aye ibedo kalarewa

ikare ducu.

2In Lubanga ma bedo nakanaka;

ma pud peya icweyo godi ki lobo,

onongo in dong itye.

3Iloko dano doko apwa,

kun iwaco ni, “Wudok cen, wun lutino pa dano!” 41

Mwaka alip kulu ki boti rom ki nino ma okato laworo;

nyo rom ki cawa acel ma i dyewor.

5Ijwero dano woko, ci gikato calo lek,

gin calo lum ma lot odiko,

6ci dongo;

otyeno ner, ci two woko.

7Akemoni tyekowa woko;

kinigani miyowa lworo madwong.

8Ityeko keto gin maracu ducu ma watimo inyimi,

wa balwa ma watimo i mung ducu nen iwangi kamaleng.

9Kare me kwowa kato akata ki ite akemoni,

mwakawa bene tum woko, ikare manok tutwal.

10Kare me kwowa twero romo mwaka pyere abiro,

nyo pyere aboro ka komwa yot;

ento gin ducu kelo can ki ayelayela keken,

pien gikato akata oyot, wangwa bene rwenyo woko.

11Anga ma niang ikom teko me akemoni,

ki pi lworo ma kinigani kelo?

12Pwonywa me niang ni nino me kwowa cek tutwal,

wek wabed ki cwiny me ryeko.

13Lok cwinyi, Ai Rwot!

Imito wanen can pi kare marom mene?

Wek kica omaki ikom lutici!

14Kwe cwinywa i odiko ki mar meri ma pe loke,

wek wawer wer wabed ki yomcwiny pi kare me kwo mewa ducu.

15Miwa yomcwiny pi kare marom ki nino ma imiyowa iye can;

marom bene ki mwaka ma walimo iye ayelayela.

16Wek wan lutici wanen tic meri,

wek deyo me tek meri onen bene bot lutinowa.

17Rwot Lubangawa, wek gum meri obed ikomwa;

mok ticwa ducu ma watiyo wek obed maber!

Eyo, mok tic mewa ducu ma watiyo wek obed maber!