Jabuli 89

Wer ikare ma peko tye i lobo

1Ai Rwot, abiwero wer nakanaka pi mar meri ma pe loke;

abitucu pi geni ki doga bot jo me yalwak ducu.

2Angeyo ni mar meri ma pe loke bedo matwal,

geni bene tye ocung woko liking calo polo.

3Iwaco ni, “Dong aketo gicike ki dano ma ayero,

akwongo kwong bot latica Daudi ni, 41

‘Abimoko likwayi gibedo matwal,

dok abiketo komkeri cung pi kare pa yalwak ducu.’”

5Ai Rwot, wek lwak ma i polo gupaki

pi tango me aura madong ityeko tiyogini,

wek guwer bene pi geni i coke pa joni maleng!

6Pe tye ngat mo i polo ma gitwero poro ki Rwot;

pe tye ngat mo kadi ki acel ikin lwak me polo marom kwedi, Rwot.

7In aye Lubanga ma kilworo i coke pa jo maleng,

in idit dok iger iloyo jo ducu ma gurumi wokoni.

8Ai Rwot Lubanga me mony,

anga matek calo in?

In lagen i jami ducu, Ai Rwot.

9Iloyo wa biamwonyi me nam ma twage;

ka biamwonyine otwage, ikweyogi woko cut.

10Inyono Rakab piny ineko woko calo inyono geng lee ma oto,

ikeyo lukwori woko ducu pi tek me badi.

11Polo ki lobo ducu meri;

lobo ki jami ducu matye iye in aye ma icweyogi.

12In aye ma icweyo lobo ma tung kumalo ki ma tung kupiny;

got Tabor ki got Kermon gipako nyingi ki yomcwiny madwong.

13Itye kitwero madit mada;

teki dwong mada.

14Kit ma atir ki ngolo kop kakare aye guti me komkeri;

mar ma pe loke, ki gen, tye i gin ducu ma itiyo.

15Gitye ki gum jo ma giwori kun giwero boti wer ki dwon malongo,

ma giwoto i dero me kicani, Ai Rwot.

16Gibedo ki yomcwiny piri dyeceng jwi,

ma gidwori pi kiti mupore.

17In aye ma imiyogi tek miyo gubedo kideyo;

pi beri botwa miyo tekwa bene tinge malo.

18In aye i kwot ma gwokowa, Ai Rwot;

in Ngat Maleng pa Icrael imiyo botwa rwot me loyowa.

Cike pa Lubanga bot Daudi

19Yam con iloko ki latici ma lagen i ginanyuta, kun iwaco ni,

“Aketo lalukana ikom dano matye ki tek,

amiyo ngat ma ayero ki ikin lwak obedo iwi komker. 202

Ayero latic ma mera Daudi,

awire ki moo maleng, aketo en obedo rwotwu.

21Teka bibedo bote kare ducu,

twerona bimiyo en bedo tek.

22Lukwore pe gibinongo yo me tayo en,

dok jo maracu pe gibiloye bene.

23Abinyono lukwore woko piny ki inyime,

dok abineko jo madage woko liweng.

24Abibedo kwede ki gen kun amare ki mar mera ma pe loke,

dok abimiye tek me loyo lukwore pi nyinga.

25Abimiyo twero me loce mede o wa i nam madit,

dok abimiyo teke o wa i kulu Euprate.

26En bilwonga ni, ‘In i Wora, ki Lubangana;

in aye Got me larena.’ 273

Abiloko en bedo latin kayo,

en bibedo rwot madit makato luker ducu ma iwi loboni.

28Abigwoko mar mera ma pe loke nakanaka pire,

dok gicikena ikin an ki en bicung liking.

29Abimiyo likwaye bedo rwodi kare ducu;

dok abimoko komkere bedo matwal macalo pol.

30Kace likwaye gibibwoto cika,

ma gibedo kun pe gilubu gin ma aciko;

31kace guturu cika

ma pe gilubu cik ma amiyogi,

32ci abipwodogi ki odo pi balgi;

can madwong adada bipoto ikomgi pi balgi.

33Ento pe abikwanyo mar mera ma pe loke woko ki ikome,

dok pe abibwoto cikena bote matwal.

34Pe abituru gicikena,

nyo kadi loko kit lok mo mayam dong otyeko a woko ki idoga.

35Dong akwongo kwong kicel ma bibedo matwal inyinga maleng;

pe abiloko lok goba bot Daudi.

36Kare ducu likwaye bibedo tye,

dok abigwoko kere bedo nakanaka calo ceng maryeny inyima.

37Bibedo nakanaka ma omoko woko liking calo dwe matye ikabedone,

bicung woko matek liking calo polo ma oyare malo.”

Koko pien kiloyo rwot

38Ento kombedi kiniga dong omaki woko ikom rwot ma in aye i wiro ki moo;

dong itenye woko liyak dok ikwere woko adada.

39Ityeko weko gicikeni woko ki latici,

ibolo lalukanane i apwa ibalo woko.

40Ityeko muku cel me gange woko ducu;

cel gogone ducu dong ireto woko piny odoko obur.

41Jo ma wok ki kenyo giyako jamine;

dong odoko gin me angala bot luwote ma gibedo cok kwede.

42In dong imiyo loc woko bot lumonene;

imiyo gin ducu gubedo ki yomcwiny.

43Eyo, iloko lak pala lucwane odoko gin ma konye peke,

imiyo kiloye woko ilweny.

44Ikwanyo odo kere woko ki i cinge,

ka ikwanyo komkere ituru ibolo woko piny i ngom.

45Imiyo en otegi otii woko ma pud tidi,

ci ileyo wiye woko.

Lega pi lar

46Ai Rwot, ibikane woko matwal?

Dok akemoni bibedo kawang calo mac pi kare marom mene?

47Ai Rwot, po kit ma kare me kwona nok kwede,

dok ipo ni dano ma icweyoni ducu mwa!

48Anga matwero bedo kun pe to?

Dok anga matwero lare kene ki ikom twero me lyel?

49Rwot, tic ducu mayam itiyo, ki mar meri ma pe lokeni, dong gitye kwene?

Geni ma ikwongo kwede kwong bot Daudini kono tye kwene?

50Ai Rwot, po ikoma an latici, nen kit ma kiyeta kwede,

nen kit ma atye kaciro kwede yet pa lwak me rok ducu.

51Ai Rwot, nen kit ma lukwori giloko kwede lok agec,

kun bene giyeto dano ma in aye i wiro ki moo ikabedo ducu ma en woto iye.

52Kipak Rwot nakanaka!

Amen! Amen!