Jabuli 88

Lega pi kony

1Ai Rwot Lubanga, akok boti dyeceng jwi pi kony;

kadi i dyewor bene akok boti.

2Winy legana,

cik iti iwiny kokona!

3Lwak can mapol opoto ikoma,

omiyo kwona dong onyiko cok ki to.

4An dong kikwana ikin jo macok ki to,

ma gibidonyo piny i bur;

tekona ducu dong otum woko.

5Acalo ngat mo ma kibwoto ikin jo ma oto;

adoko calo jo ma kinekogi madong gubutu i lyelgi,

calo jo ma wii dong pe po ikomgi matwal,

ma dong gitye kamabor ma pe iromo konyogi.

6In dong ityeko bola woko ite bur kamatut,

ka macol dok matut adada.

7Akemoni tye mapek ikoma,

imiyo amwony woko i biamwonyi me akemoni.

8Imiyo lurema gutenya woko liyak;

imiyo adoko gin malik botgi.

Kiloro wiya woko i ot ma pe atwero lwi akato kamo keken;

9wanga dong ocido woko pi cwercwiny.

Ai Rwot, akok boti nino ducu;

alegi kun atango cinga boti.

10In mono itiyo tango pi jo ma oto?

Tipugi mono gia malo kapaki?

11Tika gitito pi mar meri ma pe loke wa i lyel,

nyo pi geni bene gibitito i lobo pa jo ma oto?

12Tango me aura ma itiyogu ducu mono nen kunu i kabedo macoli,

nyo kony me lari binen i lobo pa jo ma wic owil ikomgi?

13Ai Rwot akok boti pi kony,

odiko ki odiko ducu akelo legana inyimi.

14Ai Rwot, pingo ibola woko?

Pingo ikane woko ki bota?

15Cake ma pud atidi abedo ki arem madwong ma onongo dong acok to;

abedo kaciro tim ma itimo ikoma makelo lworo,

koma dong oloc woko.

16Akemoni ouma woko lipuk;

lwenyi mager ikoma otyeka woko.

17Akemoni ki lwenyi giruma woko dyere dyeceng jwi calo lalele me pii,

ma uma woko lipuk tungi ki tungi.

18Imiyo lurema macok kweda ma amaro ducu gutenya woko liyak;

colpiny aye dong odoko luwota.