Jabuli 92

Wer me pako Rwot pi ber mere

1Miyo pwoc bot Rwot en gin maber,

wero wer me pako nyingi bene en gin maber, Ai in Mamalo Twal.

2Tucu mar meri ma pe loke i odiko ber,

ki nyutu gen meri otyeno bene ber,

3kun gigoyo nanga ki gita dok giwero ki nyamulere,

ma gilubu dwon opuk bene.

4Pien in, Ai Rwot, pi tici me aura ma itiyo omiyo abedo ki yomcwiny,

pi tic ma dong itiyo miyo awero wer ki yomcwiny.

5Tici dito ma lapore peke, Ai Rwot!

Dok tami tut ma pe tite!

6Dano ma laming pe twero ngeyo lok man,

dok dano ma wiye oding pe twero niang ikom lok man ni:

7kadi lubal gudongo macalo lum,

dok kadi lutim maracu gubedo ki kwo maber,

ento kibityekogi woko matwal.

8Ento in, Ai Rwot, ibedo dit nakanaka.

9Lumeroki, Ai Rwot,

i ada kibinekogi woko liweng,

jo ducu ma gin lutim maracu kibiketogi ci gilal woko ata.

10Imiyo adoko tek macalo jubi ma i tim,

ityeko wiro wiya woko ki moo maber.

11Atyeko neno can ma poto ikom lukwora ki wanga,

dok atyeko winyo ki ita kit koko ma jo maracu

ma onongo gutinge ikoma gikok kwede.

12Jo ma kitgi atir gidongo calo yadi otit,

gidongo maboco calo yadi cedar me Lebanon.

13Kipitogi i Ot pa Rwot,

gidongo ma gituru idyekal me Ot pa Lubangawa.

14Kadi gutii ento pud ginyako nyiggi,

piggi bedo madwong.

15Man nyutu ni Rwot kite tye atir, en gota, ma pe tiyo gin mo ma pe opore nyo marac.