Jabuli 55

Lega pa dano ma lawote odobo

1Cik iti iwiny legana, Ai Lubanga;

pe ikane woko ka abako doga boti!

2Winya, dok igam doga;

can dong obwoya woko.

3Cwinya obale woko pi winyo woo pa lukwora,

ki pi aroma ma jo maracu giuna kwede.

Gin aye ma gikelo can ikoma,

kiniga omakogi ikoma, guloke gudoko lumonena.

4Atye ki arem madwong i cwinya,

lworo me to dong opoto woko ikoma.

5Lworo omaka dok koma bene tye kamyel amyela,

dong tipu koma oto woko lirut.

6Omiyo awaco ni, “Kono nene atye ki bwoma calo akuri!

Kono atuk acito woko wek aywe.

7Ada, kono atuk acito wa kamabor,

onongo atwero butu i dye tim ata.

8Onongo kono arune oyotoyot pi nongo kalare,

wek agwoke ki ikom yamo lapiru mager wa ki ikom yamo ma kodo matek.”

9Ai Rwot, bal yub pa jo ducu ma gidaga, dok irub lebgi woko;

pien atye kaneno tim bwami ki lweny matye i taun madit.

10Dyeceng ki dyewor giwoto ki iwi cel girumu gang woko;

dok tim aranyi ki can madwong tye kanen iye.

11Nek tye kanen i kabedo ducu;

wa i cukgu gitye kaunu dano ki tim aranyi ki bwola.

12Ka lamonena aye ma onongo loko lok agec ikoma,

kono onongo atwero cirone;

ka lakwora aye ma onongo tye kanywara,

kono onongo aa woko ki bote ci akane woko.

13Ento man in aye, ma warom kwedini,

ngat ma wabedo kwede kacel,

larema kikome ma dong wangiyo kwede.

14Yam wabedo kaboko lok mamit kwedi kacel;

i Ot pa Lubanga bene wawoto ma waribe kacel.

15Wek to obin onekgi woko;

wek gulor piny i lyel ma pud gikwo,

pien tim maracu tye i dye pacogi.

16Ento ka akok bot Lubanga,

ci Rwot bilara.

17Akok bote kun acur bene,

i odiko, dyeceng ki otyeno;

pimeno en biwinyo dwona.

18En bilara dok miyo abedo ki kuc ki ilweny ma abedo kalwenyone,

pien jo mapol guero lweny ikoma.

19Lubanga ma obedo iwi komker nia wa con

biwinyo kokona, dok bimiyo lewic makogi;

pien pe gin luwiny dok pe gilubu loke,

dok bene pe gitye kilworo ikom Lubanga.

20Lawota mayam ca olwenyo ikom lureme,

oturu cikene mayam ocike kwede woko.

21Loke onongo pwot makato moo dyang,

ento cwinye onongo opong mere ki mony;

loke ducu onongo kweyo cwiny dano macalo moo,

ento gingolo dano macalo pala lucwan.

22Kel pekoni ducu bot Rwot,

ci en bikonyi;

en pe biye ni myero kidir dano ma kite atir woko wa ki acel.

23Ento in, Ai Lubanga, ibiretogi woko piny

i bur matut adada;

gin jo ma oyo remo pa jo mukene ma gin luroro bene,

pe gibibedo ma gicobo nucu kare me kwogi.

Ento an abigeno mera in.