Jabuli 56

Lega me gen ikom Lubanga

1Kica omaki ikoma, Ai Lubanga,

pien dano mapol gitye kalweny ikoma;

lumonena giuna dyeceng jwi.

2Lukwora ginyona woko dyeceng jwi,

pien jo mapol gilwenyo ikoma.

3Ka lworo omaka, Ai Lubanga,

ageno mera in.

4Ageno Lubanga, dok apake pi loke,

ageno Lubanga labongo lworo mo.

Dano mamwani kono timo gin ango bota?

5Lukwora giketo ayela dyeceng jwi pi gin ducu ma atiyo;

tamgi ducu tye marac pi keto arem ikoma.

6Gigure woko kacel kun giliba,

dok guketo cwinygi me neno kit gin ducu ma atimo.

Kit macalo gubedo kakiya kun gimito neka woko.

7Pimeno omyero ipwodgi, iculgi pi balgi;

ret lwak man woko piny ki akemoni, Ai Lubanga.

8In dong ingeyo lwak ayelayela ma abedo kwede;

dok ibedo kaneno kit ma pig wanga cwer kwede!

Meno ducu pe kicoyo i buki?

9Inino ma abikok iye boti,

lukwora kibilokogi gidok cen.

Man gin ma angeyo ada ni Lubanga tye kalweny pira.

10Ageno Lubanga, dok apake pi loke;

ageno Rwot, dok apake pi lok ma en oloko.

11Ageno Lubanga labongo lworo mo.

Dano mamwani kono twero timo gin ango bota?

12Abicobo kwonga boti, Ai Lubanga;

abityero gityer me miyo pwoc boti.

13In aye ma ilara ki i to,

pe iweko tyena ocer apoto piny kun imiyo ki an loc.

Pimeno abibedo kawot inyim Lubanga

i ceng meri maryeny ikom gin makwo ducu.