Jabuli 57

Lega pi kony

1Tima kica, Ai Lubanga, tima kica do,

pien aringo kalare boti.

Abiringo kalare ite tipu bwomi,

nio ka yamo kot ma neko piny okato.

2Akok bot Lubanga Mamalo Twal,

bot Lubanga macobo gin ma en oyubu pira.

3Lubanga bicwalo mar mere ma pe loke, kacel ki adane,

en bicwalo ki i polo ci lara;

en biloyo lukwora ma ginyona woko pinyi,

dok miyo lewic makogi bene.

4Abutu piny ikin labwor

ma guwor atika kamwodo dano.

Lakgi bit calo tong ki atero,

lebgi bene bit calo pala lucwan.

5Ai Lubanga, nyut diti malo i polo,

dok imii deyoni oryeny iwi lobo ducu!

6Lukwora guciko owic, gimito maka;

cwinya dong ool woko ki can.

Gukwinyo bur i yoo kama awoto ki iye,

ento gin dok gupoto iye keken gi.

7Cwinya omoko ikomi, Ai Lubanga,

cwinya omoko ikomi ma pe loke!

Abiwero wer kun apaki ki dwon malongo!

8In tipuna, coo woko!

Wun nanga ki opuk bene wucoo woko!

An bene abicoyo rupiny miyo ceng tuc!

9Abimiyo pwoc boti ikin lwak me rok ducu, Ai Rwot;

abiwero wer me paki ikin lurok.

10Pien mar meri ma pe loke dit, o wa i polo,

dok ada meri bene dit, o wa i pol.

11Ai Lubanga, nyut diti malo i polo,

dok imii deyoni oryeny iwi lobo ducu!