Jabuli 58

Lega bot Lubanga ni opwod jo maracu

1Wun tika wumoko lok ma atir, wun luloc?

Wun tika wungolo kop pa dano ducu ki cwiny ma atir?

2Pe wa ki acel, wupiro lok maracu ki icwinywu;

dok wutimo bal ki timo aranyi i lobo.

3Jo maracu gingak woko ikare me kwogi ducu,

gibalo nia ikare ma kinywalogi iye kun giloko lok goba keken.

4Gitye ki kwir marac macalo kwir pa twol,

gidingo itgi woko akaka calo twol uyu ma dingo ite,

5ni wek pe ewiny dwon jo ma bito twol,

wek pe ewiny dwon ngat ma timo tango.

6Ai Lubanga, tur lakgi woko;

dok iput lak lutino labwor mageri woko, Ai Rwot!

7Wek gutum woko macalo pii mamol cito woko;

wek kinyongi piny calo lum ci gutwo woko.

8Wek gubed macalo okoro ma obab woko,

nyo macalo latin ma kibwogo abwoga ma pe oneno ceng.

9Ma pud peya gungeyo myero kitonggi woko macalo yadi okutu;

Lubanga omii yamo okolgi otergi woko ki kiniga madwong!

10Jo ma kitgi atir gibibedo ki yomcwiny ka guneno culu kwor man;

dok gibilwoko tyen gi ki remo pa jo maracu.

11Dano gibiwaco ni, “Adada jo ma kitgi atir gilimo pwoc;

adada Lubanga ma ngolo kop i lobo bene tye.”