Jabuli 59

Lega pi gwok

1Lara ki i cing lukwora, Ai Lubanga,

gwoka ki ikom jo ma bino kalweny ikoma.

2Lara ki bot jo ma lutim maracu,

ki ikom jo ma gioyo remo pa dano.

3Nen, gubutu kun gikiya ma gimito neka woko;

gin jo mageri guribe woko kalweny ikoma.

Pe pi gin marac mo nyo bal ma an atimo, Ai Rwot,

4pe atimo kit roc mo, ma omiyo giringo oyotoyot i kakanegi pi lweny ikoma.

5A ibin, in Rwot Lubanga me mony ci ilara;

dok inen gi piri keni, in Lubanga pa Icrael!

Coo woko ipwod lwak me rok ducu;

pe omyero i tim kica ki ngat mo kadi ki acel

ki ikom lutim roro ma gipiro lok me timo tim maracu.

6Otyeno ki otyeno gidwogo cen kun gikok calo gwogi,

ka giwoto kun girumu kwede gang.

7Kong iwiny gin ma giwaco!

Lok ma i dogi bit calo pala lucwan.

Gitamo tam ki i cwinygi ma giwaco ni,

“Anga kono ma biwinyo lok ma wawaco?”

8Ento in inyerogi anyera, Ai Rwot;

dok ingalo rok ducu angala.

9In i teka, abiwero wer me paki;

pien in icel gogona, Ai Lubanga.

10Lubangana ma mara ki mar mere ma pe loke bibino bota;

en bimiyo aneno lukwora macalo jo ma dong aloyogi woko.

11Pe inekgi woko, miyo lutuwa wigi wil;

ketgi woko ata ki tweroni ci ityekgi woko,

Ai Rwot, in kwotwa!

12Doggi opong ki bal,

giloko lok me bal keken;

mi gumok woko i owic pi wakegi!

Pi lok me ceno dano ki goba ma gin loko,

13myero ityekgi woko ki akemoni;

tyekgi wang ma gutum woko liweng.

Man bimiyo lwak ducu ngeyo ni,

Lubanga aye maloyo jo pa Yakobo nio i agiki lobo.

14Otyeno ki otyeno gidwogo cen, kun gikok calo gwogi,

ka giwoto girumu kwede gang.

15Giwoto atata giyenyo cam,

gibedo kangur angura ka peya guyeng.

16Ento an abiwero wer ma apaki kwede pi teki,

abiwero wer ki dwon malongo odiko con pi mar meri ma pe loke.

In aye ibedo cel gogona,

dok in kalarena inino ma atye ki can.

17In i teka, abiwero wer me paki, pien in icel gogona, Ai Lubanga,

in Lubanga ma imara ki mar ma pe loke.