Jabuli 46

Lubanga tye kwedwa

1Lubanga aye kalarewa dok tekwa bene,

en oyube me konyowa ikare me can.

2Pimeno pe wabibedo ki lworo mo kadi bed lobo yenge,

kadi ka godi gupute yaka gupoto woko i dye nam;

3kadi ka pii me nam mor dok twage,

kadi ka godi giyenge pi twage mere matek.

4Tye kulu mo ma jange kelo yomcwiny i taun madit pa Lubanga,

i kabedo maleng pa Ngat Mamalo Twal!

5Lubanga tye i dye taun madit meno, pimeno pe kitwero balone wa ki acel;

Lubanga konye woko oyotoyot okokgweno.

6Rok ducu komgi oonyo koyo,

ki ker ducu oyenge woko;

Lubanga loko ki dwon mamor malongo, ci lobo leny woko.

7Rwot me mony tye kwedwa;

Lubanga pa Yakobo aye kalarewa.

8Bin inen gin me aura ma Rwot otiyo,

kit macalo omiyo lobo odong obur kwede.

9En juku lweny woko ki iwi lobo ducu;

kun turu atum ducu dok nginyo wa tong woko,

en wango lwak kwot woko liweng ki mac.

10Rwot owaco ni,

“Wubed mot ma cwinywu opye, dok wunge ni an Lubanga,

atye malo iwi rok ducu,

dok kidwora iwi lobo ducu!”

11Rwot me mony tye kwedwa;

Lubanga pa Yakobo aye kalarewa.