Jabuli 45

Wer ma kiwero pi nyom pa rwot

1Cwinya opong ki lok mabeco adada;

lok magi ducu atye kalokone bot rwot;

dok leba tye atera calo leb kalam pa karan ma oyube pi coc.

2In keken aye imunya makato co mukene ducu,

lok ma iloko ducu obedo me kica keken;

pimeno Lubanga dong otyeko miyi gum woko matwal.

3Twe pala lucwani i taci, in twon oteka,

i deyoni ki dit meri.

4Ring ngwec me loc kikome kideyo kalweny pi ada dok pi gwoko kit ma atir;

wek cingi ma lacuc otim tim me aura makelo lworo.

5Ateroni bit,

celo tucu adunu pa lukwori woko pil;

lwak me rok ducu gipoto ite loci. 61

Komkeri ma Lubanga omiyi bedo nakanaka,

odoo keri aye odoo me kit ma atir;

7imaro kit ma atir, idag tim maracu.

Pimeno Lubanga, ma Lubangani, dong, otyeko wiri ki moo,

owiri ki moo me yomcwiny makato luwoti mukene ducu.

8Ginarukani ducu kikiro iye murra ma ngwece kur,

ki kit moo makur ducu, ki kacia mamit.

I gang kali ma kideyo ki lak lyec

wer pa lugo nangagu miyo cwinyi bedo yom.

9Anyira pa rwot bene gitye ikin moni me awora;

daker ocung tung cingi ma lacuc ma oruku ruk ma kideyo ki jabu me Opir.

10Nyara, kong iwiny, ci itam mot, dok icik iti;

wii myero owil woko ikom lutuwu ki ikom jo me dogola pa kwaru.

11Beri bimiyo rwot miti;

en obedo rwodi, gung inyime iwore.

12Jo Turo gibikelo mot mapol boti kun giyenyo yo me weko cwinyi omargi,

jo ma lulonyo gibilego kony ki boti kun gikeli lwak lonyo mapatpat.

13Nyako ker oruke woko maber ki i kicikane

ki bongo ma kideyo maber ki jabu,

14oruku bongi ma rangigi patpat ka kitere kwede bot rwot,

kun anyira luwote ma gilwoke gilubu kore.

15Gitelo wigi kun gitye ki yomcwiny madwong,

ikare ma gicito ka donyo i gangkal pa rwot.

16Lutino awobeni gibileyo ka kwarini calo rwodi

ibiketogi gibedo rwodi i lobo ducu.

17Abikoro pi ywekani i yalwak ducu;

dok lwak me rok ducu gibipaki nakanaka.