Jabuli 44

Lega pi gwok

1Ai Lubanga, dong watyeko winyone ki itwa,

dok kwariwa bene gutito botwa,

tic ducu mayam itiyo i karegi,

ikare macon mukato.

2Kit ma in kikomi iryemo lurok woko ki tweroni,

ci imiyo joni gubedo i lobogi macalo yadi ma ipito;

iunu lwak me rok mapol

ento imiyo kwariwa gubedo ki kuc.

3Lwaki pe guloyo lobo meno ki pala lucwan gi,

pe gulimo loc pi twerogi;

ento meno obedo pi tweroni ki pi teki,

dok pi deroni ma ocaro komgi;

pien onongo in cwinyi yom ikomgi.

4In keken aye Rwota ki Lubangana,

mayam iciko pi loc bot Yakobo.

5Pi konyi miyo wabiloyo lukworwa,

dok wabinyono jo ma gibino kamonyowa pi nyingi.

6Pe ageno atuma,

dok pala lucwana bene pe twero lara.

7Ento in aye ma ilarowa ki i cing lukworwa,

ci imiyo lewic mako jo ma gidagwa.

8Wabedo kanyate i Lubanga teretere,

dok wabimede kapwoyo nyingi matwal.

9Ento in dong ityeko bolowa woko dok imiyo wadoko mayot,

pe itelo wiwa ka wacito kalweny ikom lumerokwa.

10Imiyo waringo woko ki bot lumerokwa wadwogo woko cen;

ci imiyo lukworwa guyako jamiwa mapol ata.

11Imiyo wadoko calo romi me aneka,

dok ikeyowa woko ikin lurok.

12Icato lwaki i wel manok mo,

pe imito ni kicul wel madwong pirgi.

13Imiyo luwotwa ma gibedo cok kwedwa loko lok me cac ikomwa,

imiyo jo ma gibedo i kabedo ma orumuwa gicayowa dok gingalowa.

14Imiyo wadoko lok aboka ikin lurok,

wadoko ginanyera ikin rok ducu.

15Abedo ki cwercwiny dyeceng jwi,

ma nongo wanga olwal woko ki lewic,

16pi winyo lok cac pa jo ma giloko lok agec ikomwa,

ki lok pa jo ma ginywarowa,

dok pi neno lukworwa ma gin lucul kwor

ma gubino kalweny ikomwa.

17Man ducu dong otime ikomwa,

kadi bed wiwa pe owil ikomi,

dok bene kadi pe waturu gicikeni.

18Cwinywa pe oa ki ikomi wa ki acel,

dok bene pe wangak waweko lubu ciki.

19Itenyowa woko liyak ikin lee tim,

iumuwa woko lipuk ki colpiny mapek.

20Kace nene wiwa owil woko ikom nying Lubangawa,

nyo ka onongo wacako woro lubanga mukene mayam pe wangeyo,

21kono Lubanga mono pe oroto man ongeyo woko?

En ngeyo mung ducu matye i cwiny dano. 221

Ento piri oweko kibedo kanekowa dyeceng jwi,

kikwanowa macalo romi me aneka.

23Coo woko, Ai Rwot! Pingo inino anina?

Coo woko! Pe ibolwa woko matwal!

24Pingo ikane woko ki botwa?

Pingo wii wil woko ikom can ma watye kwede

kun ineno anena ka kiunuwa?

25Kiretowa woko ducu piny i ngom;

waryebe piny i apwa pien kiloyowa woko.

26A malo, ibin ilarwa!

Larwa pi mar meri ma pe loke!