Jabuli 43

Lega pa oringayela

1Ai Lubanga, pid pira dok imii alo kop,

dok igeng ngeya ki ikom lwak me rok ma pe gingeyi;

lara ki i cing jo maracu ma lubwola.

2In aye Lubanga ma oweko aringo alaro boti;

pingo ibola woko cen kamabor?

Pingo wii owil woko ikoma?

Pingo awoto ma akumu akuma

ma nongo lakwora tye kauna tutwal?

3Dong icwal deroni ki adani;

wek gutela,

wek gukela ikom got meri maleng,

wa i odi kama ibedo iye!

4Ci abicito wa ikom keno tyer pa Lubanga,

bot Lubanga ma yomo cwinya mada;

ci dong abipaki ki opuk agoya,

Ai Lubanga, in Lubangana.

5Pingo cwinya obale woko, dok pingo abedo ki cwercwiny?

Pingo awinyo lwak par madwong i cwinya?

Abigeno Lubanga aye, dok abipake bene,

en lalar mera ki Lubangana.