Jabuli 42

BUK ME ARYO

Jab 42—72

Lega pa oringayela

1Kit macalo til yenyo kwede kulu ma piine tye kamol,

an bene atye kayenyo Rwot ki i cwinya kitmeno,

ayenyo in, Ai Lubanga.

2Cwinya mito anen Lubanga, en Lubanga makwoni.

Abicito kaneno wang Lubanga awene wek awore?

3Pig wanga dong odoko cama,

i dyeceng naka wa i dyewor benebene,

ma nongo dano gipenya teretere ni,

“Lubangani mono tye kwene?”

4Cwinya dem woko ka apo ikom lok magi,

kit macalo yam acito kacel ki lwak,

kun atelo wigi i rek ma gurye aryeya me cito i Ot pa Lubanga,

kun lwak gidange ki yomcwiny ma giwero wer me pwoc,

ikare me kwero nino madito.

5Pingo cwinya obale woko, dok pingo abedo ki cwercwiny?

Pingo awinyo lwak par madwong i cwinya?

Abigeno Lubanga aye, dok abipake bene,

en lalar mera ki Lubangana.

6Cwinya obale woko, oweko apo piri,

ki i lobo me Jordan ki Kermon, ki i got Mijar kama aringo ayela iye.

7Calo nam madongo matut ma lwongo nam wadigi,

ki i mor pii ki iwang acurcurni;

calo biamwonyini ducu me pii ma twage ma dong otyeko mwonya woko lipuk.

8Rwot miyo mar mere ma pe loke ryeny ikoma i dyeceng;

ci i dyewor awero wer me pake,

kun alego Lubanga mamiyo ki an kwo.

9Abiwaco bot Lubanga ma en gota ni,

“Pingo wii owil woko ikoma?

Pingo awoto ma akumu akuma

pien lakwora tye kauna tutwal?”

10Nen calo atye ki bur marac tutwal mudet ikoma,

pien lukwora gibedo kayeta, kun gipenya teretere ni,

“Lubangani ni tye kwene?”

11Pingo cwinya obale woko, dok pingo abedo ki cwercwiny?

Pingo awinyo lwak par madwong i cwinya?

Abigeno Lubanga aye, dok abipake bene,

en lalar mera ki Lubangana.