Jabuli 41

Lega pa latwo

1Tye ki gum dano ma paro pi lucan;

Rwot bilare woko ikare me peko.

2Rwot bigwoko en dok weko en bedo kwo;

kibilwonge ni ngat ma kome gum i lobo;

Rwot pe bimiyo en bot lukwore wek gutime rac macalo gitwero.

3Rwot gwoke ikare manongo en two,

dok cango twone woko liweng maber.

4Ento an, awaco ni, “Ai Rwot, kica omaki ikoma;

canga do, kadi bed atimo bal ikomi!”

5Lukwora giwaco lok marac ikoma ni,

“En bito awene, wek nyinge orweny woko?”

6Jo ma gibino kalima pe gitye ki ada, giloko lwak lok ma tere peke,

kun nongo cwinygi opong ki lok me tim aranyi;

ka dong gukato gucito woko, ci gitito loke woko kamaleng.

7Jo ma daga ducu gikwilo lok ikoma;

dok giparo ni gin marac myero opot ikoma.

8Giwaco ni, “Two marac adada dong omake,

pe dong bitwero a ki i kabutu kadi ki acel.” 91

Kadi larema maber atika mayam ageno,

ma ocamo kwona bene, en aye dok oloke katimo gin marac ikoma.

10Ento in, Ai Rwot, kica omaki ikoma,

canga ikom twonani wek aa malo, ci abiculu kwor ikomgi.

11Kace lakwora pe loya dok pe bedo ki wake ikoma,

ci miyo angeyo ni in kara cwinyi yom ikoma.

12Ento dong ityeko konya pi lengcwinya,

ka dong iketa me bedo inyimi matwal. 132

Kipak Rwot Lubanga pa Icrael,

kipake nakanaka! Amen! Amen!