Jabuli 40

Wer me pak

1Akuru Rwot kun adiyo cwinya;

ci en ociko ite owinyo kokona.

2En owota woko ki i bur marac, ki i coto manwang,

ci oketa acung iwi got,

ci omiyo abedo kawot atir.

3En opwonya ki wer manyen,

ki wer me pako Lubangawa.

Jo mapol gibineno ci lworo bimakogi woko,

ci gibigeno Rwot.

4Tye ki gum dano ma geno Rwot,

ma pe loke ribe ki jo ma luwake,

dok ma pe ribe ki jo ma ngak woko kun giworo lubanga ma pe ada!

5Ai Rwot Lubangana, itiyo tic madito me aura mapol,

dok iyubu lwak yub mapol pi konyowa;

pe tye ngat mo macalo in!

Ka onongo nene aromo tucu dok tito pirgi,

kono onongo gipol adada

ma pe kitwero kwano welgi. 61

Pe imito gitum kadi gityer;

ento ityeko yabo ita wek abed ngat ma lawiny.

In pe ipenyo pi gitum awanga nyo pi gitum me bal.

7Ka dong agamo ni, “Nen, an a en;

pi tiyo gin ducu ma kicoyo i buk adolani pira.

8Cwinya bedo yom me tiyo gin ducu ma imito, Ai Lubanga;

amako ciki dok agwoko tye i cwinya.”

9Dong atyeko tito lok maber me yomcwiny me lari

i dye lwak i coke madit;

nen, pe amiyo doga woko ma aling alinga,

kit macalo in bene ingeyoni, Ai Rwot.

10Pe akano lok me lari pira kena,

ento aloko pi ada ki pi lari;

dok pe amungo mar meri ma pe loke kacel ki adani

bot lwak ma i kacoke madit.

11Ai Rwot, pe itwona kicani,

wek mar meri ma pe loke ki adani,

gugwoka nakanaka.

Lega pi kony

(Jab 70:1-5)

12Gin marac ma welgi pe kwane

guruma woko dyere;

bala dong obwoyo koma woko, miyo pe dong aneno piny;

gipol gikato yer wiya woko;

tekcwiny dong orwenyo woko ki bota.

13Ai Rwot, mii cwinyi obed yom me lara!

Ai Rwot, bin oyotoyot ikonya!

14Wek lewic omak jo ma gimito neka,

dok gubed ki anyobanyoba bene; wek kidwokgi cen,

wek alee otwodgi,

gin jo ma mito tima maraci!

15Wek gubed ma piny orem kwedgi woko pi lewic ma dong omakogini,

gin jo ma ginyerani!

16Ento mii jo ducu ma giyenyo in

gubed ki yomcwiny madwong ikomi;

dok imii jo ma gimaro lari

gumede ki waco nakanaka ni, “Rwot dit!”

17An gira lacan, dok piny obwoya woko;

ento Rwot tamo pira.

In aye lakony ki lalara;

Ai Lubangana, pe igale!