Jabuli 39

Tucu bal pa dano matye ki arem

1Awaco ni, “Abigwoke ikit gin ducu ma atiyo,

wek pe atim bal ki lok ma aloko;

abiling ma pe angamo doga kawaco lok mo,

kace atye kacel ki jo maracu.”

2Aling alinga ma pe awaco lok mo,

dok bene ajuke kekena kadi me waco gin mo maber;

ento cwercwinya dok omede ameda marac,

3ci cwinya olyeti woko dok owang matek.

Ikare ma pud alwodo lok, ci mac olyel;

ci acako lok maber labongo lworo ni,

4“Rwot, mi ange agikina, dok imiya ange wel ninona;

wek ange bene kit makwona rwenyo kwede woko oyot!

5Nen, ingolo ninona tye manok mo,

dok kare me kwona pe gin mo ki boti.

Adada dano acel acel cung mere macalo aluu nono!

6Adada dano rwenyo woko calo tipu yat!

Adada gicane nono pi gin ma pe konyo;

dano kano lonyo madwong, kun pe ngeyo anga ma bileyone.

7Dong kombedi mono, Rwot, akuru gin ango?

Gena tye ikomi.

8Lara ki i bala ducu.

Pe imii adok gin angala pa luming.

9Aling woko litik, pe aromo ngamo doga kalok;

pien in aye ma imiya peko ma kit man.

10Pe dok imede kapwoda ki odooni;

adong me cingi ma idonga kwede dong mito neka woko.

11Ka ipwodo dano

kun ijuke pi bal,

ityeko bere woko macalo nyenye ma camo gin mo ma pire tek bot dano meno;

adada dano mere rom ki aluu mamwa.

12Ai Rwot, winy legana,

dok icik iti iwiny kokona;

pe iling woko alinga ka akok boti!

An a weloni pi kare manok mo,

dok an labedo macalo kwariwa ducu.

13Kong dong iweka mono, wek abed ki yomcwiny mo,

ma pud peya aa aweko lobo man woko matwal.”