Jabuli 38

Lega pa dano ma labalo matye ki arem

1Ai Rwot, pe ijuka ki kiniga, dok pe ipwoda ki akemo!

2Ateroni dong gucela, gumwony woko i iya,

kun cingi bene odonga omiyo apoto piny.

3Atye ki arem matek,

pi kinigani;

pe atye ki yotkom i cogona ducu

pi bala.

4Bala dong oketo koma woko;

gipek calo yec ma pe aromo tingone.

5Wang bura kwok mangwe

pi mingona.

6Arem koma dwong ma okula woko piny,

oweko abutu i ngom aryeba cwiny dyeceng jwi kun akumu akuma.

7Pyera bene wange awanga calo mac,

pe atye ki kit yotkom mo wa ki acel.

8Koma oloc dok onyonge woko adada;

acur pien atye ki remcwiny madwong tutwal.

9Ai Rwot, in ingeyo gin ma amito ducu,

gin ma abedo kacur pireni pe obedo me mung ki boti.

10Adununa tye ka gone matek lituktuk, miyo tekone bene tum woko;

wanga bene ocor woko, pe neno piny dong maber.

11Lurema ki luwota ma wabedo kwedgi gicung ki cen kamabor pi bur ma oonyo ikoma,

ki lutuwa bene gicung ki cen kamabor adada.

12Jo ma giyenyo yo me neka guciko owicgi pira,

jo ma gimito keto ret ikoma giloko lok me tyeko kwona woko,

gibedo kapiro lok marac ikoma dyeceng jwi.

13Ento an abedo macalo ladingit, pe awinyo lokgi;

dok abedo calo ladogeoto ma pe ngamo doge kalok.

14Eyo, adoko calo dano ma ite oding, ma pe winyo lok,

macalo latelebe oto ma pe gamo lok mo.

15Ento gena ducu tye ikomi, Ai Rwot;

Ai Rwot Lubangana, in aye ma ibigamo doga.

16Alegi alega keken ni, “Pe iwek lumonena gunyate ikoma,

pe iwek jo ma gidaga gunong yomcwiny ikoma ka apoto i peko,”

17Dong acok poto,

atye kawinyo arem ikoma kare ducu.

18Atucu bala,

kun cwinya cwer mada pire.

19Lukwora ma gidaga nonono labongo gin mo ma abalo botgi gitek,

jo ma gidaga labongo telok mo gipol.

20Jo ma giculu gin marac pi gin maber gudoko lukwora,

pien amito ni atii gin maber.

21Ai Rwot, pe ibwota;

Ai Lubangana, pe ibed bor kweda!

22Bin oyot ikonya,

Ai Rwot, lalara!