Jabuli 37

Agiki pa jo maracu ki pa jo ma kitgi atir

1Cwinyi pe myero opot pi jo maracu;

pe ibed ki mone ikom jo ma gitiyo gin marac;

2pien gibitwo woko calo lum,

dok gibiner woko calo pot dek madyak.

3Gen Rwot, dok i tii gin maber; bed i lobo ki kuc.

4Bed ki yomcwiny i Rwot,

ci en bimiyi gin ducu ma cwinyi mito.

5Mii kwoni bot Rwot; gen en, ci en bikonyi.

6En bimiyo beri ryeny calo ceng,

dong kiti ma atir bibedo calo ceng maryeny i cwiny dyeceng.

7Bed mot inyim Rwot, dok idi cwinyi ikure.

Pe ipar pi ngat matye kalony oyotoyot,

kadi pi ngat macobo yube me timo gin maracu.

8Pe iwek kiniga omaki, dok iwek akemo obedi;

pe ibed ki par iye, pien tim ma kitmeno kelo gin marac keken.

9Lutim maracu kibityekogi woko;

ento jo ma gigeno Rwot gibicamo lobo.

10Odong kare manok, ci dano marac dong bibedo peke matwal;

kadi ingii i kabedone maber ci ibinongo ni en dong peke kunu. 111

Ento jo mamwol aye gibicamo lobo;

gibibedo ki yomcwiny pi lonyo madwong ma gibilimo.

12Dano marac piro lok ikom dano ma kite atir,

dok kayo lake ikome matek.

13Ento Rwot nyero dano marac anyera,

pien neno ni, nino me ngolo kop ikom dano marac dong tye kabino.

14Jo maracu giwoto pala lucwan gi dok gitelo atumgi,

me neko lucan kacel ki jo ma piny obwoyogi,

ki pi neko jo ma cwinygi atir.

15Pala lucwan gi bicobo cwinygi keken gi,

ki atumgi bene kibituru woko.

16Gin mo manok ma dano ma kite atir tye kwede ber

kato lonyo madwong ma jo maracu mapol gitye kwede.

17Twero ma jo maracu gitye kwede kibituru woko;

ento Rwot bigwoko jo ma kitgi atir.

18Rwot gwoko jo ma lubu cike;

dok gipinygi birii nakanaka.

19Lewic pe bimakogi ikare me can, dok gibibedo ki cam madwong ikare me kec.

20Ento jo maracu, ma gin lukwor pa Rwot,

gibito gitum woko macalo lum i olet dyang,

gibiduny woko calo yito ma duny ci rweny woko.

21Dano marac mako banya, ento pe twero culu wange,

ento dano ma kite atir lakica, miyo mere jami amiya nono.

22Jo ma Rwot omiyo gum botgi aye gibicamo lobo,

ento jo ma dong en ocenogi kibityekogi woko.

23Rwot telo dano ikit kwo ma myero en obed kwede,

dok bene gwoko dano makwone yomo cwinye

24Kadi oyoke, ci pe bipoto piny,

pien Rwot tye jole woko ki cinge.

25Yam abedo latin, kombedi dong adoko dit;

ento pud peya aneno kibwoto dano ma kite atir,

kadi ki lutinone bene pe aneno ka gilego ginacama alega.

26En nino ducu ber, miyo jami amiya,

dok dano gimako banya bote,

ki lutinone bene gidoko jo makelo gum bot dano.

27A woko ki i gin marac, ci i tii gin maber,

ci in ki likwayi wubicamo lobo.

28Pien Rwot maro ngolo kop atir;

dok pe bibwoto jo ma gigeno en.

En bigwoko jo ma kitgi atir matwal,

ento kibityeko lutino pa jo maracu woko ducu.

29Jo ma kitgi atir gibicamo lobo,

dok gibibedo iye matwal!

30Dano ma kite atir loko lok me ryeko,

dok loko gin matye atir.

31En gwoko cik pa Lubangane i cwinye;

pe ngak woko ki iye.

32Dano marac neno ngat ma kite atir,

ci yenyo yo me neke woko.

33Ento Rwot pe bibwoto en ata i cing lakwore,

nyo ni kingol kop oloye ka kikelo en kapido.

34Ket geni ikom Rwot, dok ilub cike,

ci en bimiyi twero me camo lobo;

dok ibineno bene ka kityeko jo maracu woko.

35Aneno dano marac ka keto gero mukato kare ikom jo mukene,

kun dongo mede ameda calo yat cedar me Lebanon.

36Lacen ka akato ki kenyo, anongo ni en dong pe matwal;

kadi bed ayenye, ento pe dong en twero nonge.

37Nen dano ma pe ki bal mo, dok inen dano ma cwinye atir;

dano makelo kuc likwaye bedo tye.

38Ento jo ma lubalo kibityekogi woko liweng;

ki likwayo pa jo maracu bene kibijwerogi woko.

39Rwot aye ma laro jo ma kitgi atir;

en bene ma gwokogi ikare me can.

40Rwot konyogi, dok larogi ki bot jo maracu,

pien giringo gilaro bote.