Jabuli 36

Tim maracu pa dano

11

Bal me turu cik loko kamatut i cwiny dano marac;

dano ma kitmeno pe tye ki lworo mo keken ikom Lubanga.

2Bal miyo en bwole kekene dok umu wange woko,

kun tamo ni pe kibinongo gin marac ma en timo,

mamiyo dano kwere woko.

3Lok ma en loko obedo lok me tim aranyi ki me bwola keken;

pe dong tye ki ryeko mo ma weko en tiyo gin maber.

4En piro lok me timo gin marac ma kun nongo obutu iwi kitandane;

en loko kite woko i yo ma pe ber;

dok pe kwero kit gin mo keken marac.

5Ai Rwot, mar meri ma pe loke o wa i polo,

dok adani bene o i pol.

6Poreni ocung matek liking macalo godi madongo,

kit ngolo kopi tye calo kama tut ma i nam madit.

Ai Rwot, in aye ma igwoko dano kacel ki lee ducu.

7Ai Rwot, ber me mar meri ma pe loke dit ma pe wace!

Jo ducu giringo gilaro kakane ite bwomi.

8Giyeng ki lwak cam madwong matye i odi,

dok imiyo gimato pii ma oa i kulu me yomcwiny matye boti.

9In aye iwang it me kwo ducu,

i deroni wan bene waneno iye dero.

10Med mar meri ma pe loke bot jo ma gingeyi,

dok imed lar meri bot jo ma cwinygi atir.

11Pe iwek dano ma lawake oket dic ikoma,

pe iwek dano marac oryema woko cen.

12Nen lutim maracu kiretogi aryeba ic,

kidiyogi woko piny ma pe dok gitwero a malo.