Jabuli 35

Lega pi lar ki i cing lumerok

1Ai Rwot, juk jo ma giyela;

dok ilweny ki jo ma gilwenyo ikoma.

2Mak kwot ki gin me gengo kori, ci ibin ikonya.

3Bed ma iyube ki tong ki latong me lweny

me rwate ki jo ma giryemo kora.

Wac ki tipuna ni, “An lalari.”

4Wek lewic omak jo ma gimito neka woko

dok alee myero otwodgi.

Wek gin jo ma gipiro lok marac ikoma

guloke gudok cen ki lewic madwong!

5Wek gubed calo cung kal mayamo tingo woko,

ma kun lamalaika pa Rwot tye ka ryemogi.

6Mii yoogi ocid woko dok obed pwot ma cerogi acera,

dok iwek lamalaika pa Rwot oryem korgi.

7Guciko obwo gukano woko pira labongo bala mo;

dok bene gukwinyo bur wek apot iye ato woko.

8Wek can opot ikomgi atura otyekgi woko;

ki obwo ma gukanoni aye bene omakgi,

mi gupot i bur gutum woko!

9Abibedo ki yomcwiny i Rwot,

abibedo ki yomcwiny pien Rwot olara.

10Abiwaco lok man ki cwinya ducu ni,

“Ai Rwot, anga mono macalo in,

in ma ilaro dano magoro ki i cing jo ma gitek giloye woko?

Ilaro ngat magoro ki ma piny obwoyo ki i cing jo ma yako jamine woko.”

11Caden ma cwinygi rac gikati kamaleng me tito lok ikoma,

kun gipenya pi gin ma pe angeyo.

12Gicula ki gin marac pi gin maber;

piny dong orem kweda woko.

13Ento an aruku bongo cola ikare ma onongo komgi lit,

dok amine kena i can me rii kec.

Alego ma agoyo kora kun akulu wiya piny pirgi,

14macalo onongo akumu pi larema nyo pi omera.

Abedo kawot atata macalo dano ma koko mine,

kun akule piny kakumu.

15Ento ikare ma ayoke gin ducu gubedo ki yomcwiny,

gucoke kacel ikoma;

jo mayam pe angeyogi

gucoke ikoma kayeta ma pe gitwero ling.

16Gumede kangala ma nongo doggi bit ikoma,

ma gupong ki adagadaga madit ikoma.

17Ai Rwot, ibibedo kanena anena pi kare marom mene?

Lara woko ki i gerogi,

lar kwona ki i dog labwor magi.

18Ci abimiyi pwoc madit mada i coke madit;

dok abipaki kama lwak jo mapol gugure iye. 191

Pe iwek lukwora ma gin lutim maracu gubed ki yomcwiny ikoma,

pe iwek jo ma gimiyo wangi lirwitrwit guloya,

gin jo ma daga labongo bal mo.

20Pe giloko lok makelo kuc,

ento gipiro meggi lok maracu ikom jo ma gibedo mot i lobo,

gupong ki lok me bwola keken.

21Gingamo doggi malac me lok ikoma,

kun giwaco ni, “Aa! Aa! Watyeko neno gin ma itimo!”

22Ai Rwot, dong ineno, pe myero iling alinga do!

Pe ibed bor kweda, Ai Rwot!

23Coo woko, cuke me ngolo kopa;

pid pira, in Rwoda ki Lubangana!

24In ipore, Ai Rwot, pimeno kwany kop woko ki iwiya;

pe iwek lukwora gunong yomcwiny ikoma do, Lubangana.

25Pe iwek gulok keken gi kun giwaco ni,

“Aa! Dong wanongo gin ma cwinywa mito.”

Dok pe iwek guwac ni,

“Dong watyeko mwonye woko.”

26Wek lewic omakgi dok gubed ki anyobanyoba lawangacel,

gin jo ma gibedo ki yomcwiny pi can ma omaka!

Wek gupong ki lewic ma alee bene otwodgi,

gin jo ma giwake ikomani!

27Wek jo ma cwinygi mito ni alo kop gudange pi yomcwiny kun giwaco nakanaka ni,

“Rwot dit, cwinye yom kaneno ni latice bedo ki kuc!”

28Ci abitito pi poreni,

dok abipako nyingi dyeceng jwi.