Acoli Bible Revision
Jabuli 47
Lubanga aye lawi luloc ducu
Wudong cingwu, wun lwak ducu me wi lobo ducu!
Wudange kun wuwero wer me yomcwiny bot Lubanga ki dwon malongo!
Pien Rwot, ma en Ngat Mamalo Twal, aye myero kilwor,
en rwot madit maloyo wi lobo ducu.
En aye omiyo waloyo lwak me rok ducu,
en oketowa me bedo luloc pa lurok.
En aye ma oyero lobo man pirwa kama wabedo iyeni,
man aye gipiny me wake pa Yakobo ma en maro.
Lubanga dong oito malo kun lwak gidange matek,
Rwot oito malo ma lwak gikutu tum.
Wuwer wer me pako Lubanga, wuwer wer me pake!
Wuwer wer me pako Rwotwa, wuwer wer me pake!
Lubanga aye Rwot maloyo wi lobo ducu;
wuwer wer me pak ki jabuli!
Lubanga loyo rok ducu;
Lubanga bedo iwi komkere maleng.
Rwodi ma giloyo lwak me rok ducu gucoke
ma guribe kacel ki jo pa Lubanga pa Abraim.
Pien teko pa Lubanga dit makato tek me kwot ducu me wi lobo;
piman myero kidwore matek tutwal!
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.