Jabuli 48

Cion, taun madit pa Lubanga

1Rwot dit, pimeno myero kipake matek i taun madit pa Lubangawa! 21

Got mere maleng ber, dok wiye bor,

ma yomo cwiny lwak me wi lobo ducu,

en got Cion matye kamabor tung kumalo,

en aye gang pa Rwot madit.

3Ki i gogone Lubanga onyute

ni en aye lagwok matek.

4Nen, luker gucoke,

gubino gugure kacel pi monyo Got Cion.

5Ikare ma guneno, cutcut gubedo ki ur madit mada,

ci lworo omakogi marac, ka guringo woko ata.

6Komgi omyel matek ki kunu,

macalo arem madwong pa dako matye kanywal,

7macalo mel me Tarcic mayamo ma oa tung kunyango twago.

8Kit ma watyeko winyone, dong bene waneno

i taun madit pa Rwot me mony, i taun madit pa Lubangawa,

ma Lubanga miyo cung liking nakanaka.

9Wabedo ki tam ikom mar meri ma pe loke,

Ai Lubanga, i dye odi.

10Kit macalo nyingi oywek kwedeni, Ai Lubanga,

omiyo pak ma kipaki kwede oromo wi lobo ducu.

Cingi ma lacuc opong ki twero me loc;

11wek got Cion obed ki yomcwiny!

Wek taun madito ma i Juda gubed ki yomcwiny

pi kit ma ingolo kwede kop!

12Wucit i Cion, wuwot wurum cele woko,

wukwan wel lubelene,

13ka dok wutam maber ikom cele,

wucit wuwot wa i gogone bene;

wek wutit bot yalwak ma bilubuwu ni,

14“Man aye Lubanga,

en Lubangawa ma bedo nakanaka.

En bibedo latelawa matwal.”