Jabuli 49

Geno lonyo obedo mingo

1Wuwiny lok man, wun lwak me rok ducu!

Wuwiny, wun jo ducu ma wubedo iwi lobo,

2jo matye ki rwom mamalo ki jo me rwom ma piny,

lulonyo kacel ki lucan.

3Abibedo katamo tam wek aniang maber ki i cwinya,

dok abiloko lok me ryeko keken.

4Abiciko ita me winyo carolok;

abigonyo telok me koclit ki wer ma agoyo agoya ki opuk.

5Pe abibedo ki lworo ikare me can,

ma nongo lumonena ma gitima marac guruma woko dyere!

6Gin jo ma geno lonyogi,

ma ginyate pi lwak lonyogi madwong ma gitye kwede.

7Adada, pe tye dano mo matwero koke kekene,

nyo matwero miyo wel mo bot Lubanga me wilo kwone.

8Pien gin kok me kwo pa dano wele dit tutwal,

dok bene pe tye gicul mo ma romo bot Lubanga,

9ma weko en omede ki bedo kwo nakanaka,

ma pe en to.

10Eyo, ngat mo keken neno ki wange ni kadi wa jo maryek bene gito,

luming kacel ki jo ma wigi oding bene gito,

ci giweko lonyogi dong bot jo mukene.

11Lyelgi doko ganggi matwal,

bibedo kabedogi pi kare pa yalwak ducu,

kadi bed gucak nying lobo ma gibedo iye ni meggi kikomgi.

12Deyo pa dano pe twero lare ki i to;

en obedo macalo lee tim ma gito gitum woko.

13Man aye can ma poto ikom jo matye ki gen me mingo;

man agiki pa jo ma cwinygi yom pi dul jami ma gitye kwede.

14Adada gin bito macalo romi;

to aye ma bibedo kakwayogi, ci gibicito atir gidonyo wa i lyel,

ci komgi bitop woko;

lyel bibedo ganggi.

15Ento Lubanga bikoko tipuna ki i twero pa lyel,

pien en gire bigama.

16Pe iwek lworo omaki kace inen ngat mo doko lalonyo,

ma lonyone tye kamede ameda.

17En pe bikwanyo gin mo cito kwede ikare ma en to;

lonyone pe bilube i bur lyel.

18Kadi bed en tamo ni etye ki yomcwiny ikare ma pud ekwo,

kun dano gipake pi lonyoneni,

19en bicito kabedo kacel ki yalwak pa kwarine i lyel

ma pe dong bimedo ki neno dero ceng matwal.

20Deyo ma dano tye kwede pe bigengo en to;

en pud bito macalo lee tim.