Jabuli 50

Woro me ada

1Lubanga Matwero ducu,

ma en Rwot, dong oloko;

en lwongo jo me wi lobo ducu cake ki tung kunyango nio kwede tung kupotoceng.

2Lubanga tye karyeny ki i Cion,

en taun madit maber tutwali.

3Lubangawa tye kabino, en pe biling,

mac mager tye ka wang inyime,

yamo magwa ma kodo matek orume woko dyere.

4En lwongo polo ki malo, ka dok lwongo lobo,

wek dong ecak ngolo kop ikom lwake.

5En waco ni, “Wucok jona ma lugen, wukelgi bota,

jo ma guketo gicike kweda ki gitum!”

6Polo tucu ni Lubanga opore,

pien Lubanga aye langolkop.

7“Wuwiny, wun jona, an dong abilok, wun jo Icrael,

abimiyo lok me caden ikomwu.

An Lubanga, Lubangawu.

8Pe ajukuwu pi lwak gitumwu mapol,

ki gitum awanga ma wutyero bota kare ki kare.

9Pe abigamo twon mo ma wukelo ki i gangwu,

kadi nyok dyel ma wukwanyo ki i dwolwu.

10Lee me bunga ducu mera,

wa lwak dyangi ma gitye iwi cere alip kuluni bene gin mera.

11Angeyo winyi ducu ma gituk i dye yamo,

ki gin makwo ma gibedo i tim ducu mera.

12Kace nene kec neka pe onongo atwero tito botwu?

Pien lobo ki jami ducu matye iye mera.

13An mono acamo ringo twoni,

nyo wuneno amato remo nyogi romi?

14Wutyer gityer me miyo pwoc bot Lubanga,

wucob kwongwu bot en Mamalo Twal.

15Wukok bota ikare me can;

an abilarowu,

ci wubipaka.”

16Ento bot dano marac Lubanga waco ni,

“Kit twer ango ma itye kwede me kwano cika,

ki me bedo kaloko lok ikom gicikena?

17In ikwero ni pe myero kijuki,

dok ibolo lok ma aciko odok tung ngeyi.

18Kace ineno lakwo, ci imako doko laremi;

dok ibedo kacel ki lutim abor.

19Kare ducu iyube me loko gin marac;

lok ma a ki i dogi obedo lok goba.

20Kama ibedo iye icako loko lok marac ikom omeru;

ikwoto omeru kikome ma latin pa meni.

21Meno ducu itiyo ento an aling alinga:

omiyo itamo ni gwok nyo abedo ngat mo ma kite rom ki merini.

Ento kombedi dong ajuki, dok anyuti bali ducu kamaleng.

22Kong wutam man, wun jo ma wiwu wil woko ikom Lubangani,

wek pe atyekwu woko, ci dong ngat mo ma bilarowu bibedo peke.

23Ngat ma miya pwoc macalo gitume nongo keto deyo ikoma;

ki ngat ma bedo ki kit ma atir kun lubu cika abinyutu lara bote.”