Jabuli 27

Lega me pak

1Rwot aye dero mera ki lalara; abilworo anga?

Rwot gwoka ki igin marac ducu;

pimeno pe abilworo ngat mo keken.

2Ka lutim maracu guero lweny ikoma kun gimito neka woko,

jo ma gin lukwora ki lumonena,

gibicato ci gipoto woko piny.

3Kadi dul mony mo oruma woko dyere,

pe abibedo ki lworo i cwinya;

kadi gier lweny ikoma,

pud abibedo ki gen aye ikom Rwot.

4Onongo alego Rwot pi jami acel,

abiyenyo en jami aceli keken ni,

myero abed i Ot pa Rwot pi kare me kwona ducu

wek abed kaneno ber pa Rwot,

dok apeny doge ki i ode.

5En bikana i ode,

ikare me can;

biuma woko i kemane,

dok biketa acung malo iwi got.

6Pimeno abiloyo lukwora woko ducu

ma giruma woko dyereni;

dok abityero gitum i Ot pa Rwot kun adange ki yomcwiny madwong;

abiwero wer kun apako Rwot

ki dwon mamit.

7Winya, Ai Rwot, ka akok boti matek,

nyut kicani bota dok igam doga!

8Iwaco ni, “Bin bota.”

Agamo ki i cwinya kun awaco ni,

“Abibino boti, Ai Rwot.”

9Pe ikane woko ki bota.

Pe iryem latici woko ki kiniga; in aye ibedo lakonya.

Pe ibola woko, dok pe ibwota, Ai Lubanga lalara!

10Wora ki maa gitwero bwota woko,

ento Rwot gire bigwoka.

11Pwonya wek ange yoni, Ai Rwot,

tela awot i yoo ma opire maber,

wek lukwora pe guliba.

12Pe imiya bot lumonena;

pien lucaden ma lugoba gucung kaloko lok gobagoba ikoma,

ma giloko loke ducu ki gero.

13Aye ni abineno ber pa Rwot,

ma pud abedo ikin jo makwo i lobo.

14Gen Rwot; bed ma itek, dok ibed ki tekcwiny; eyo, gen Rwot!