Jabuli 26

Lega pa dano ma cwinye ber

1Ngol kop atir, Ai Rwot,

pien abedo katiyo gin ma atir,

kun ageno in ki cwinya ducu ma pe akalo akala.

2Ngiya maber, Ai Rwot, dok itema;

tem cwinya ki tama ducu.

3Pien mar meri ma pe loke aye tela,

dok geneni aye ma nyuta yo.

4Pe abedo kacel ki jo ma lugoba,

dok pe aribe ki jo ma lubwola.

5Adag ribe ki lutim maracu,

pe bene abibedo kacel ki jo maracu.

6Ai Rwot, alwoko cinga pi nyutu ni apeke ki bal mo,

kun awori ma awoto arumu kwede keno tyeri.

7Dok awero wer me pwoc ki dwona malongo,

kun atito bene pi tic me aura ma itiyo.

8Ai Rwot, amaro odi kama ibedo iye,

ma en aye kabedo kama deyoni tye iye.

9Pe ityeka woko kacel ki lubalo,

dok pe ineka woko kacel ki jo ma gioyo remo pa dano.

10Gin jo ma cwinygi tye pi timo gin marac,

ma jabagi opong woko ki lim me wil i mung.

11Ento an atiyo gin ma atir;

lara, dok inyuta kicani.

12Abedo ki kuc ma gin marac mo peke ma gudu koma;

abipako Rwot i dye lwake ma gucoke.