Jabuli 25

Lega pi tel ki pi gwok

1Atingo kwona amiyo boti, Ai Rwot.

2Ageno in, Ai Lubangana, pe iwek lewic omaka;

pe iwek lukwora gunyera.

3Eyo, pe iwek lewic omak jo ma giketo gen gi ikomi;

ento wek lewic omak jo ma gijemo woko ikomi nonono.

4Pwonya wek ange yoni ducu, Ai Rwot;

pwonya me ngeyo yoni.

5Tela i ada meri, dok ipwonya,

pien in Lubanga lalara,

aketo gen mera ikomi jwijwi.

6Po pi kicani, Ai Rwot, ki pi mar meri ma pe loke,

mayam inyutu nia wacon.

7Pe ipo pi roc ki bal mayam atimo ikare me tinona.

Ento po pira pi mar meri ma pe loke,

ki pi beri, Ai Rwot.

8Rwot ber, dok cwinye atir;

pimeno en pwonyo lubalo yo ma myero gulubi.

9En telo jo mamwol me tiyo gin ma atir,

dok pwonyogi wek gunge gin ma en mito.

10Yo pa Rwot ducu opong ki mar ma pe loke dok ki gen,

pi jo ma gigwoko gicikene ki lok me cik ma mere.

11Pi ber me nyingi, Ai Rwot, wek bala, pien dwong.

12Jo mene mono ma lworo Rwot?

Rwot bipwonyogi yo ma myero gulubi.

13Gin ki komgi bibedo ki gum ma rii nakanaka,

dok lutinogi bene gibicamo lobo.

14Rwot bedo larem jo ma gilwore,

dok bene en miyo gingeyo gicikene.

15Aneno bot Rwot kare ducu,

pien en bigonyo tyena woko ki i owic.

16Loke idwog bota, dok inyuta kicani;

pien dong adong kena, dok can odiya woko.

17Kwany cwercwiny woko ducu ki i cwinya,

dok ilara ikwanya woko ki i lwak can ma atye iye.

18Tam pi cana ki ayela ma atye kwede,

ci iwek bala ducu.

19Tam pi lwak lukwora ma gitye,

nen kit ma gidaga kwede ki gero matek!

20Gwok kwona, dok ilara;

pe iwek kiket lewic iwiya,

pien aringo alaro boti.

21Mii bera ki cwiny ma atir ma atye kwede gugwoka, pien ageno in.

22Ai Lubanga, lar jo Icrael ki i pekogi ducu.