Jabuli 24

Rwot madit

11

Lobo kacel ki jami ducu matye iye gin jami pa Rwot;

lobo kacel ki jo ducu ma gibedo iye bene mere.

2En con oketo lobo iwi nam,

dok oketo te gutine ocung matek i dye pii me kulu matut.

3Anga matye ki twero me ito malo iwi got pa Rwot?

Anga matwero cung i kabedone maleng? 42

Ngat ma tiyo gin ma atir, dok ma cwinye leng,

ngat ma pe miyo kwone me woro lubanga ma pe ada,

dok ma pe kwongo kwong ki goba.

5Rwot bimiye gum,

Lubanga lalare bimiyo en loyo kop.

6Meno gin aye jo ma giyenyo en,

gin jo ma gibino inyim Lubanga pa Yakobo.

7Wutinge, wuyabe malac, wun dog cel!

Wuyabe, wun dogola macon,

wek rwot madit me deyo odony.

8Anga mono ma rwot madit me deyo?

En Rwot matek matye ki twer,

en Rwot matek maloyo lweny!

9Wutinge, wuyabe malac, wun dog cel!

Wuyabe, wun dogola macon,

wek Rwot me deyo odony.

10Rwot me deyo man en anga?

Rwot me mony

aye Rwot madit!