Jabuli 28

Lega pi kony

1Akok boti do Ai Rwot;

pe iding iti woko kawinyo kokona do, in gota,

pien ka iling woko ma pe igamo doga,

miyo adoko ngat acel ikin jo ma gidonyo piny i lyel.

2Winy dwon me lega me bako doga boti ka akok boti pi kony,

kun atango cinga malo boti ma akemo kwede Ot meri maleng.

3Pe ingol kop oloya kacel ki jo maracu,

ki jo ma timo gin marac,

gin jo ma giloko ki luwotgi lok makelo kuc

kun gitamo ki i cwinygi me timo tim aranyi. 41

Culgi muporo kit timgi,

ma oporo timgi maracu,

culgi muporo ticgi maracu

mi gunong can pi gin marac ma gutimo.

5Gin pe giparo pi gin ma Rwot otimo,

kadi pi tic me cinge;

pimeno en biturugi woko,

ma dok pe kibigero matwal.

6Kipak Rwot,

pien en dong otyeko winyo kokona me bako dog.

7Rwot aye teka dok kwota;

agene ki cwinya ducu.

En okonya omiyo cwinya opong ki yomcwiny madwong,

dok awero wer me pak kun amiyo pwoc bote.

8Rwot aye tek pa lwake,

en aye kama dano ma en oyero ringo laro iye.

9Lar lwaki, dok imii gum ikom jo ma gin meri.

Bed lakwatgi, dok igwokgi nakanaka.