Jabuli 11

Bedo ki gen ikom Rwot

1Aringo alaro bot Rwot.

Pingo wuwaco bota ni,

“Tuk woko calo winyo, wek icit ibed iwi godi;

2pien jo maracu gutero atum,

dok guketo te aterogi ikom tol atum,

wek gicel jo ma cwinygi atir woko i colpiny.

3Pe tye gin mo ma dano ma kite atir twero timo,

ka te guti ducu dong kibalo woko?”

4Rwot tye i Ot mere maleng; komkere tye i polo.

En neno dano ducu ma i lobo, dok ngiyo gin ma gin tiyo.

5Rwot ngiyo cwiny dano ducu, jo ma kitgi atir ki jo maracu,

en dag ngat ma maro timo tim bwami.

6En bionyo lodi mac ki gweng calfa ikom jo maracu;

en bipwodogi ki yamo oro malyet.

7Rwot kite tye atir,

dok maro tim ma atir;

jo ma kitgi atir gibineno wange.